Սփյուռքում գործող լրատվամիջոցների ղեկավարների բոյկոտը Հայաստան-սփյուռք համաժողովի շրջանակներում անցկացվող լրագրողների համահայկական 7-րդ համաժողովին սփյուռքի նախարարությունում բոյկոտ չեն համարում:
«Աժիոտաժ չէ, 5 մարդու անհիմն արտահայտությունները չեմ համարում աժիոտաժ, նույնիսկ մտահոգություն էլ չեն առաջացնում: Չեմ կարողանում բացատրել, թե այդ մարդիկ ինչով են մտածում: Նույնիսկ համաժողովի խորագրին ծանոթ չեն, գոնե խորագիրը կարդո՞ւմ են, որ իմանան, այդ համաժողովի նպատակը, քննարկման թեմաները: Համաժողովի խնդիրներից թեքվում են հասնում են «Արի տուն» ծրագրին, սա ի՞նչ է նշանակում, թող գան ու հիմնավորեն իրենց ասածները: Իսկ ծանո՞թ են այդ ծրագրին»,- Aravot.am-ին ասաց սփյուռքի նախարարության տեղեկատվության եւ հեռահաղորդակցության վարչության պետ Վաղինակ Վարդանյանը:
Հիշեցնենք, որ այսօր ասուլիսի ժամանակ սփյուռքահայ լրագրողները անիմաստ էին համարել այդ համաժողովի մասնակցությունը` պնդելով, որ քննարկման թեմաները նախապես ծրագրված են, ու սփյուռքին մտահոգող թեմաներ չեն արծարծում:
«Որ բան են ասում, պետք է հիմք ունենան: Դրանք փաստարկված չեն: Նրանք չեն հայտնել որեւէ դժգոհություն, հրավիրել ենք, նույնիսկ հաստատել են, որ գալու են»,- շարունակեց նախարարության ներկայացուցիչը:
Կարդացեք նաև
Նրա տվյալներով, այս անգամ սփյուռքից 300 լրատվամիջոցի են հրավերք ուղարկել, բայց մասնակցելու են 105 ներկայացուցիչ: Այս հանգամանքն էլ պարոն Վարդանյանին համաժողովը բոյկոտելու մասին չի հուշում, ասաց.«Մարդիկ իրենց միջոցներով են գալիս, ֆինանսական ծախսեր են: Ում հարմար է, նրանք են գալիս»:
Անդրադառնալով սփյուռքահայերի դժգոհություններին, թե սփյուռքին մտահոգող հարցերը համաժողովի ժամանակ օրակարգից դուրս են մնում, պարոն Վարդանյանը զարմացավ. «Եթե հերյուրանք ասեմ, երեւի ճիշտ կլինի, չե՞ն կարդացել համաժողովի ծրագիրը: Նման միջոցառումներն ունեն ծրագիր, չէ՞, այդ ծրագրով ժամանակագրորեն նշված է` ինչ պետք է տեղի ունենա: Այն, որ ներկայացնում են, թե այս կամ այն համազգային խնդիրները չեն քննարկվում, ուղղակի ինձ զարմացնում է: Մեզ համար կարեւորագույն խնդիրը` ցեղասպանության ճանաչման, պահանջատիրության հարցերը 100 ամյակին ընդառաջ ինչպես կարող են չքննարկվել: Ու ինչ դժգոհություններ եւ ինչ տարակարծություններ կարող են լինել ցեղասպանության թեմայի շուրջ»:
Արփինե ՍԻՄՈՆՅԱՆ
Անկախ այն բանից, թե ով ինչ է ասել կամ արել, պետական ծարայողին վայել չէ այդ արտահայտությունը’ թե ‘նրանք ինչո՟վ են մտածում”: Գուցե վարչության պետը չգիտի, թե իր ասածը ինչ է նշանակում: Թող հարցնի, հետո օգտագործի այդ բառերը:
Համակարծիք եմ սփյուռքում գործող լրատվամիջոցների ղեկավարների դիրքորոշման հետ: Ինչ վերաբերվում է Վաղինակ Վարդանյանի մտքերին, կապված ցեղասպանության ճանաչման հետ, ապա միանշանակ է, որ չպետք է սփյուռքի նախարարությունն իր թեփն ուրիշի ալյուրի հետ խառնի, քանի որ այդ հարցերով միշտ զբաղվել ու արդյունքի են հասել սփյուռքահայությունն ու արտգործնախարարությունը: Դժվար չէ հասկանալ, որ ձեր նախարարին ոչ սփյուռքում են ընդունում, ոչ էլ Հայաստանում, իսկ նախարարությունում նրա կողմից կազմակերպված անիմաստ և իրավիճակից չբխող կոմսոմոլային միջոցառումներն անիմաստ են ու անպտուղ: