«Մոդուս Վիվենդի» վերլուծական կենտրոնի ղեկավար Արա Պապյանն այս համոզմունքը հայտնեց այսօր «Տեսակետ» ակումբում լրագրողների հետ հանդիպման ժամանակ:
«Ես այս մասին խոսում եմ տարիներ ի վեր: Հայաստանի Հանրապետությունը կամ կարող է լինել մեծ ու հզոր, կամ չի լինի ընդհանրապես: Այսպես արնաքամ կլինի արտագաղթով, տնտեսական տկարացմամբ եւ այլն: Սա պատահական հարց չէ: Այն ժամանակին գիտականորեն ուսումնասիրվել է: ԱՄՆ-ում մի ամբողջ հանձնաժողով է աշխատել պրոֆեսոր Վեստերմանի գլխավորությամբ: Նրանք եկել են այն սահմանի կոնֆիգուրացիային եւ չափին, որով Հայաստանը կարող է կենսունակ պետություն լինել: Եթե որեւէ մեկը կարծում է, թե Հայաստանի Հանրապետությունը 42 հազար քառակուսի կիլոմետրով, ելք չունենալով դեպի ծով, շրջապատված թշնամիներով, կարող է բարեկեցիկ ու ապահով ապագա ապահովել իր քաղաքացիների համար` անգամ դեմոկրատական Հայաստանը, սխալվում է: Էլ չեմ ասում, որ դեմոկրատիան ինքնին հարցականի տակ է դրվում, որովհետեւ երբ դու նման փոքր երկրում` փակ սահմաններով, ունենում ես տնտեսական մոնոպոլիաներ, իսկ դա նպաստում է մոնոպոլիաների ձեւավորմանը, տնտեսական մոնոպոլիան բերում է քաղաքական մոնոպոլիայի», – համոզված է Արա Պապյանը:
Շարունակելով անդրադառնալ Հայաստանի անկախ եւ հզոր պետություն դառնալու հետ կապված խնդիրներին` բանախոսն ասաց. «Եթե Հայաստանը լինի անկախ պետություն, շատերը շահագրգռված կլինեն Հայաստանի հզորացմամբ եւ մեծացմամբ: Բայց եթե Հայաստանը դառնում է կախյալ պետություն, բնականաբար Հայաստանի հզորացումը արդեն բերում է մի ուրիշ ճամբարի հզորացման… Իմ համոզմամբ, Հայաստանի անկախ պետության գոյության միակ իմաստը հայկական հարցի լուծումն է: Որովհետեւ եթե մենք պիտի ունենանք պետություն, որը պիտի զբաղվի ճանապարհները ասֆալտելով, կոյուղագծեր, ջրագծեր քաշելով եւ ուրիշի զորքով պաշտպանելով սեփական հայրենիքը, դա կարող ենք ավելի մեծ հաջողությամբ անել` մտնելով այլ երկրի կազմի մեջ: Ասենք` Ռուսաստանի կամ Թուրքիայի: Եթե մենք անկախ պետություն ենք, պետք է պետական եւ ազգային խնդիրներ լուծենք, այլ ոչ թե թաղապետարանին վայել: Աշխարհի ամենաաղքատ երկրները 33-ն են, որոնք ելք չունեն դեպի ծով: Եվ դրանցից մեկը մենք ենք»:
Աշոտ ՀԱԿՈԲՅԱՆ
Կարդացեք նաև
