«Հանրապետություն» կուսակցության առաջնորդ Արամ Սարգսյանի համոզմամբ՝ Գագիկ Ծառուկյանը երբեք չի պահանջի Սերժ Սարգսյանի հրաժարականը, իսկ ոչ իշխանական քառյակի քայլերը չեն կարող բերել համակարգային իշխանափոխության:
«Գագիկ Ծառուկյանը երբեք չի ասել, որ ինքը գնում է իշխանափոխության, ինքը երբեք չի ասել, որ ինքը ընդդիմադիր է, ինքը երբեք չի պահանջել նախագահի հրաժարականը, ինքը չի ասել, որ ինքը արտահերթ ընտրությունների կողմնակից է: Ես համոզված եմ, որ նման բան չի ասելու, որովհետև տեսնում եմ, որ էդ կուսակցությունները անկախ չեն ու մի մարդու որոշելով չեն», – «Ազատության» հետ զրույցում ասաց Արամ Սարգսյանը՝ հավելելով, թե իրականում, «Բարգավաճ Հայաստան» կուսակցությունը շատ քիչ է տարբերվում Հանրապետականից:
«Նույն Բարգավաճն էլ, Հանրապետականն էլ ընտրությունների ժամանակ փող են բաժանում: Քաղաքականությունը տեսնում են նյութական միջոցներով և տնտեսական հնարավորություններով և ամենակարևորը՝ գաղափարական առումով երկուսն էլ Եվրասիական տնտեսական մոդելի կողմնակից են: Եվ երբ որ իրենք խոսում են համակարգային փոփոխությունից, ինձ համար ծիծաղելի է: Ի՞նչ համակարգային փոփոխություն, եթե գնում ես Պուտին – Լուկաշենկո – Նազարբաև օրինակին, որը ոչ միայն հետ է, այլև ծիծաղելի է առաջադեմ աշխարհի համար», – ընդգծեց Սարգսյանը:
Ըստ Սարգսյանի, անգամ եթե ԲՀԿ-ն ու իր դաշնակիցները գան իշխանության, խոշոր հաշվով, Հայաստանում ոչինչ չի փոխվի, ու կմնա նույն օլիգարխիկ համակարգը․ – «Եթե Հայաստանը պիտի զարգանա Եվրասիական մոդելով, էական չի, թե իշխանության ով է գալու: Բացի այդ՝ ես «Բարգավաճ Հայաստան» կուսակցությունը երբեք էլ չեմ համարել կուսակցություն՝ քաղաքական առումով: Դա Ռոբերտ Քոչարյանի ստեղծած կառույցն էր, որտեղ մարդիկ համախմբվել են Գագիկ Ծառուկյանի նյութական ու ֆինանսական միջոցների շուրջ, ով էլ, իր հերթին, իր նյութական ու ֆինանսական միջոցները պաշտպանելու համար քաղաքական ուժ է ձևավորել»:
Կարդացեք նաև
Մանրամասները կարող եք կարդալ` «Ազատություն» ռ/կ-ի կայքում
