Աղձքում պեղումներ կատարած հնագիտական արշավախմբի ղեկավար, հնագետ Հակոբ Սիմոնյանը, որը նաեւ ՀՀ մշակույթի նախարարության «Պատմամշակութային ժառանգության գիտահետազոտական կենտրոն» ՊՈԱԿ-ի փոխտնօրենն է, Tert.am-ին ասել էր , որ Արշակունիների դամբարանը պեղելու համար Հայաստանում գումարներ հատկացվել են 70-ականների սկզբներին, նաև՝ 2000-ին՝ երջանկահիշատակ Անդրանիկ Մարգարյանի կողմից: Ըստ նույն աղբյուրի, նա նաեւ նշել էր, թե Մշակույթի նախարարությունն Արշակունիների դամբարանը պեղելու համար գումար այս տարի չի հատկացրել:
«Ես չեմ ասել նախարարությունը գումար չի հատկացնում, ինձ ասել են ֆինանսավորել են, ասել եմ ոչ: Հիմա էլ հանդես եմ գալիս որպես գիտնական եւ այդ արշավախմբի ղեկավար: Կարծում եմ, որ խնդիրը պետք է հստակ սահմանազատվի, դա գիտական խնդիր է, այդ հուշարձանը վտանգված չէ, առաջնահերթ վերականգման անհրաժեշտություն չկա, չկան անհրաժեշտ տարրեր, ուսումնասիրություններ, խորհրդային տարիներին տարածքը պեղվել է եւ բարեկարգվել: Ավելին անելու համար պետք է լուրջ ծրագիր, համատարած պեղումներ, ու հենց բացահայտվեն դետալները, նոր՝ դրանից հետո խնդիր պետք է դրվի վերականգնման»,-Aravot.am-ի հետ զրույցում ասաց պարոն Սիմոնյանը:
Մշակույթի նախարարի տեղակալ Արեւ Սամուելյանն էլ Աղձքի դամբարանի ֆինանսավորման վերաբերյալ Aravot.am-ի հարցին ի պատասխան նշեց. «Աղձքի դամբարանը՝ իր լրջությամբ լինելով չտեսնված կարեւոր մեր պատմության համար, բարեբախտաբար առավել վտանգված հուշարձանների ցանկում չէ: Այժմ անհրաժեշտություն կա գիտական ուսումնասիրության, այն ի թիվս այլ հուշարձանների, նախ գիտական ուսումնասիրության կարիք ունի: Հնագիտական զարգացման հայեցակարգ է պատրաստվում, որը կներկայացվի նախագահին, այդ մեծ ծրագրի շրջանակներում կրկին կանդրադառնանք Աղձքի դամբարանին: Աղձքի հուշարձանը՝ իր պատմամշակութային դերով ու նշանակությամբ պետք է առաջնային ուշադրության կենտրոնում լինի, այժմ էլ այն բարեկարգ է, ցանկապատ կա, հուշատախտակ կա, պարոն Սիմոնյանն էլ մշտապես այդ հուշարձանով զբաղվում է: Շատ լավ է, որ լիազոր մարմինը մենակ չէ, եւ մեր պատգամավորերն էլ են ուշադրություն դարձնում հուշարձաններին»:
Կարդացեք նաև
Հիշեցնենք, որ վերջերս խորհրդարանում հուշարձանի հարցը բարձրացրել է ԱԺ պատգամավոր Արագած Ախոյանը, իսկ Սամվել Ֆարմանյանը, Տաճատ Վարդապետյանը եւս մի քանի պատգամավոր ցանկություն են հայտնել առաջիկայում այցելել այդ տարածք:
Գոհար ՀԱԿՈԲՅԱՆ
