Ոչ իշխանական չորս ուժերի համագործակցության եւ իշխանություն-ընդդիմություն հարաբերությունների վերաբերյալ մեր հարցերին պատասխանում է «Ժառանգություն» կուսակցության փոխնախագահ ԱՐՄԵՆ ՄԱՐՏԻՐՈՍՅԱՆԸ:
-Սահմանադրական փոփոխությունների խնդիրը կարո՞ղ է դառնալ այն բաժանարար գիծը, որը ճակատագրական լինի քառյակի ձեւաչափով համագործակցության համար։
-Հույս ունեմ, որ ոչ, որովհետեւ երկրի այսօրվա վիճակի մեղավորը սահմանադրությունը չէ։ Իսկ այն, որ գործող սահմանադրությունը բարելավման կարիք ունի, եւ խորհրդարանական մոդելը նախընտրելի է կիսանախագահական կառավարման համակարգից՝ երկու կարծիք լինել չի կարող. մենք տարիներ շարունակ խոսել ենք այդ մասին։
Բայց ամբողջ խնդիրն այն է, թե ինչ մեխանիզմներ են դրա տակ դրվում. եթե մեխանիզմներն այնպիսին են, որ խորհրդարանական կառավարման քողի ներքո պետք է վերահաստատեն եւ ամրապնդեն մեկ անձի, մեկ կուսակցության գերիշխանությունը, բնականաբար մեզ համար դա անընդունելի է։
Կարդացեք նաև
-Գ.Ծառուկյանի հարցազրույցի՝ սահմանադրական փոփոխություններին վերաբերող հատվածը տարաբեւեռ մեկնաբանությունների տեղիք տվեց՝ ոմանք դա ընդունեցին որպես նահանջ մերժողական դիրքերից, պատրաստակամություն՝ ներգրավվելու բարեփոխումների գործընթացում։ Այդ տեսակետն արդարացվա՞ծ է։
-Չեմ կարծում, թե դա պատրաստակամություն է՝ մասնակցելու սահմանադրական փոփոխությունների գործընթացին։ Մասնակցության հայտ ներկայացնող կուսակցության առաջնորդը չէր ասի՝ եթե իշխանությունը համառի, մենք էլ կգնանք, կվերցնենք լավագույն դահլիճները, կլցնենք հրապարակները։ Կամ չէր խոսի սուտ քննարկումների մասին, չէր ասի՝ որտե՞ղ եք անցկացրել այդ քննարկումները. գյուղերո՞ւմ՝ վարկերի տակ կքած գյուղացիների հետ, թե՞ օդանավակայանում, որտեղից մարդիկ հազարներով արտագաղթում են։
-Այն, որ «Ժառանգությունը» ֆորում է հրավիրել՝ նվիրված սահմանադրական փոփոխություններին, չի՞ նշանակում, որ կամա-ակամա դուք էլ եք մասնակցում այդ քննարկումներին։
-Ձեր ասածը ճիշտ կլիներ, եթե մենք մտնեինք բովանդակային քննարկումների մեջ։ Բայց մեր հրավիրած ֆորումը ոչ թե փոփոխությունների բովանդակության, այլ պահի նպատակահարմարության շուրջ է լինելու՝ արդյոք անհրաժե՞շտ է այս պահին սահմանադրական փոփոխություններ անցկացնել, եւ որքանո՞վ վստահության արժանի է այն իշխանությունը, որը նախաձեռնել է այդ փոփոխությունները։ Սրա՛ մասին է խոսքը՝ մենք պատրաստվում ենք ներկայացնել մեր քաղաքական հիմնավորումները, փաստարկները։
-Այդուհանդերձ անտրամաբանական չէ՞, որ քաղաքական ուժերի մի մասը փաստաթուղթը չտեսած՝ կտրականապես մերժում է առաջարկվող փոփոխությունները, մյուսները նույնպիսի ջերմեռանդությամբ պաշտպանում են դեռեւս գոյություն չունեցող փաստաթուղթը։
-Գոնե «Ժառանգության» պարագայում այդ հարցադրումը տեղին չէ, որովհետեւ, կրկնում եմ, մենք բովանդակային քննարկումների մեջ չենք մտնում, հետեւաբար փաստաթղթին ծանոթ լինել-չլինելու խնդիր չենք տեսնում։
Ավելին՝ մենք ներկայացրել ենք մեր հակընդդեմ առաջարկները, եւ իշխանությունների կողմից դրանք չեն ընդունվել, ուստի մեզ համար միանշանակ պարզ է, որ այդ գործընթացը ձեռնարկելով՝ իշխանությունն ընդամենը վերարտադրության խնդիր է փորձում լուծել։
-Նկատի ունեք Ընտրական օրենսգրքի բարեփոխման՝ 100 տոկոս համամասնական ընտրակարգի անցնելու առաջարկությո՞ւնը։
-Ոչ միայն։ Մենք առաջարկել ենք մեկ տարվա ընթացքում անցկացնել սահմանադրական հանրաքվե, դրանից հետո նշանակել արտահերթ համապետական ընտրություններ, ինչը եւս իրենց կողմից մերժվել է։
Լիլիթ ՊՈՂՈՍՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
