Իրավապաշտպան Ավետիք Իշխանյանը հակաիրավական է համարում նախօրեին Արզնիում անցկացված ոստիկանների զորավարժությունների սցենարը, բողոքի ակցիայի ժամանակ «Լեւոն, Լեւոն» վանկարկելը:
Հիշեցնենք, որ ըստ սցենարի բողոքի ակցիայի մասնակիցները իբրեւ թե չեն ենթարկվում ոստիկանության հրամաններին եւ Ազատության հրապարակից փորձում են հասնել Սահմանադրական դատարան: Կողմերի միջեւ պարբերաբար տեղի են ունենում բախումներ: Հնչում է պայթյուն, կրակոցներ: Ոստիկան-ցուցարարներն էլ իբրեւ թե ՀԱԿ-ականներ են՝ «Լեւոն, Լեւոն» էին կանչում:
«Երեւույթն է մտահոգիչ, իհարկե պետք է, որ ոստիկանները իրազեկված լինեն, թե ինչպես պետք է պահեն իրենց բազմամարդ հավաքների, անկարգությունների ժամանակ, բայց այդպիսի զորավարժություններն այնպես կարելի է անել, որ ի ցույց հանրությանը չլինեն: Սրա նպատակն էր ցույց տալ, թե ինչպես են ոստիկանները պատրաստ ցանկացած ժամանակ ճնշել հավաքները, հանրությանը ի ցույց դնել ոստիկանության ուժն ու իշխանությունը պահելու պատրաստակամությունը»,- Aravot.am-ին ասաց պարոն Իշխանյանը:
Նրա խոսքով, նման զորավարժությունների ժամանակ պետք է փորձել պայմանական անուններ օգտագործել. «Ոչ թե հայտնի անուններ ներքաղաքական կյանքից: Քաղաքական իրական անուններ դնելն ընդունելի չէ: Նույնիսկ կարելի էր արտասահմանյան անուն վերցնել, ոչ հայկական:
Կարդացեք նաև
Ինչ վերաբերում է ոստիկանապետի հայտարարությանը, թե ոստիկանությունը ապաքաղաքական կառույց է, ուղղակի ծիծաղելի է, որովհետեւ ինչպես խորհրդային տարիներին Հայաստանի ոստիկանությունը կոմունիստական կուսակցության պաշտպանն էր, անկախ Հայաստանի ստեղծվելուց հետո էլ ոստիկանությունը իշխանությունների պաշտպան է: Հանրությունը երբեք ոստիկանությանը չի զգացել որպես իր կամ հասարակական կարգի պաշտպան: Այդպես եղել է եւ Լեւոն Տեր-Պետրոսյանի, եւ Ռոբերտ Քոչարյանի, նույնն էլ հիմա շարունակվում է Սերժ Սարգսյանի իշխանության տարիներին: Ոստիկանության ծառայությունը նույնիսկ կառավարության կազմի մեջ չի մտնում, այլ ուղղակի հենց ենթարկվում նախագահին: Ոստիկանությունը ոչ թե օրենքին է հետեւում, այլ կատարում է հրամաններ:
Ոստիկանության նման զորավարժությունը հակաիրավական է, բայց ոչ հակաօրինական, որովհետեւ Հայաստանում օրենքով ոստիկանությունը ենթարկվում է նախագահին»:
Արփինե ՍԻՄՈՆՅԱՆ
