Հունահռոմեական ոճի ըմբշամարտի աշխարհի չեմպիոն Արթուր Ալեքսանյանն այսօր Գյումրիում լրագրողների հետ ճեպազրույցում անկեղծացավ, որ հայրենիք ոտք դնելուն պես նոր միայն հասկացավ, որ աշխարհի չեմպիոն է դարձել: «Շատ հուզված եմ, այսպիսի ընդունելության չէի սպասում, հիմա նոր հասկացել եմ, որ դարձել եմ աշխարհի չեմպիոն, ինչ եմ արել ես իմ երկրի, քաղաքի համար»: Լրագրողներից մեկի այն դիտարկմանը, որ աշխարհին ապշեցրել է նրա հաղթանակի արագությունը, չեմպիոնի փոխարեն շտապեց ծիծաղելով պատասխանել նրա կողքին կանգնած քաղաքապետ Սամվել Բալասանյանը. «էդքան կարող էր, էդքան արեց»:
Իսկ Արթուրը ծիծաղով արձագանքեց. «Արագ ստացվեց. առաջ էին տվել կադրերը»: Չեմպիոնն ասաց, որ հավաքների ժամանակ կողոսկրի վնասվածք է ստացել, բայց դա չի խանգարել չեմպիոն դառնալուն: Իսկ ի՞նչ կասի իր սպորտդպրոցի խայտառակ պայմանների մասին. լրագրողներից մեկի այս հարցին դարձյալ շտապեց պատասխանել Սամվել Բալասանյանն ասելով `«պարզ չէ՞»: Չեմպիոնը ևս դժգոհեց, որ պայմաններն ահավոր են, բայց խոստացել են բարելավել, կառուցել: Չեմպիոնը նաև ասաց, որ Գյումրին սպորտասերների քաղաք է և միշտ իր թիկունքին է:
«Յուրաքանչյուր մրցման գնում եմ միայն հաղթելու»,-ասաց չեմպիոնը` պատասխանելով օլիմպիական չեմպիոն դառնալու մասին հարցին:
Կարդացեք նաև
Նունե ԱՐԵՎՇԱՏՅԱՆ
