«Նման զարգացումները միանգամայն դրական են: Սա մեր` Արցախի, Հայաստանի եւ Սփյուռքի հերթական հաղթանակն է, ինչը վկայում է Արցախի Հանրապետության միջազգային ճանաչման գործընթացի անշեղելիության մասին»,- Aravot.am-ի հետ զրույցում ասաց ԼՂՀ նախագահի մամուլի քարտուղար Դավիթ Բաբայանն` անդրադառնալով Եվրամիության տարածքային խորհրդարանի կողմից ԼՂՀ անկախության ճանաչման փաստին:
Վերջերս ԱՄՆ-ի Կալիֆոռնիայի նահանգը ճանաչեց ԼՂՀ անկախությունը, ապա, որոշ ժամանակ անց` սեպտեմբերի 12-ին, Եվրամիության տարածքային խորհրդարանը պատմության մեջ առաջին անգամ փաստաթուղթ է ընդունել, ըստ որի աջակցում է Լեռնային Ղարաբաղի ինքնորոշման իրավունքի իրագործմանը: Բասկերի երկրի Գիպուզկոա նահանգը մի օր առաջ էր ճանաչել ԼՂՀ անկախությունը: Թեպետ աշխարհաքաղաքական խաղացողներից որեւէ մեկը դեռ նման հեղափոխական քայլի չի գնում, բայց ստեղծված աշխարհաքաղաքական այս իրավիճակում հայկական երկրորդ պետության համար կարծես բավական նպաստավոր պայմանների նախադրյալներ են ստեղծվում:
Aravot.am-ի հետ զրույցում անդրադառնալով հարցին` ի՞նչ մտահոգություններ, մտավախություններ կամ ոգեւորություններ դրսեւորել այս իրավիճակում, ԼՂՀ նախագահի մամուլի քարտուղարն ասաց. «Այդ մտահոգությունները ԼՂՀ-ի ճանաչման հետ կապ չունեն: Մեր հիմնական խնդիրը մեր պետության անվտանգության եւ անկախության պահպանումն է, իսկ դրան սպառնում է առաջին հերթին Ադրբեջանը եւ նրան սատարող Թուրքիան, որը չի ճանաչում 1915 թվականի Ցեղասպանությունը, շարունակում է Հայաստանի շրջափակումը, սատարում է Ադրբեջանին»:
Դավիթ Բաբայանն այն կարծիքին է, որ առանց ԼՂՀ-ի ճանաչման էլ այդ երկու պետությունները կշարունակեն իրենց ապակառուցողական քաղաքականությունը: Իսկ Արցախի միջազգային ճանաչումն, ըստ մեր զրուցակցի, թուրքական պետությունների ապակառուցողական քաղաքականության դեմն առնելու ամենալավ քայլերից մեկն է:
«Արցախի ճանաչումը ցույց է տալիս, որ մեզ դիտարկում են որպես նորմալ եւ քաղաքակիրթ երկիր, ինչն իր հերթին մեծ հարված է տոտալ եւ ֆաշիստական Ադրբեջանին եւ նրա կողմից վարվող քաղաքականությանը»,- եզրափակեց Դավիթ Բաբայանը:
Կարդացեք նաև
Նելլի ԳՐԻԳՈՐՅԱՆ
