ՀՀ ոստիկանության ՔԳՎ Երեւանի Կենտրոնականի քննչական բաժնի քննիչի վարույթում է գտնվել երկու տարի առաջ Զարուհի Պողոսյանի հաղորդումը: Ըստ այդ հաղորդման, Խանջյան փողոցի իրենց բնակարանը վաճառելու նպատակով առքուվաճառքի պայմանագիր է կնքվել Արփինե Մայսուրյանի հետ: Բնակարանը երեք տարի առաջ գնել է Ա. Մայսուրյանը, սակայն, ըստ հաղորդում տվողի, գումարի մի մասը գնորդը չի տվել:
Նախապատրաստվել էին նյութեր, անգամ երեսունմեկամյա Արփինե Մայսուրյանի նկատմամբ խափանման միջոց է փոխվել, նրան ազատազրկել են մեկ ամսից ավելի, պահել «Աբովյան» քրեակատարողական հիմնարկում: Հետագայում երկու միլիոն գրավով խափանման միջոց է կիրառվել:
Արփինե Մայսուրյանը բացատրություն է տվել եւ հայտնել է, որ ստորագրել է ստացական, համաձայն այդ ստացականի՝ գումարը փոխանցել է Զարուհի Պողոսյանին:
Ապա գնացել են Կենտրոն նոտարական գրասենյակ, որտեղ կնքվել է առքուվաճառքի պայմանագիրը: Նույնը պնդել է նաեւ Արփինեի մայրը` Կարինե Ասլանյանը, հայտնել, որ նոտարական վավերացումից հետո է բնակարանի գումարը տրվել, եւ մինչ օրս իրենք ապրում են իրենց գնած բնակարանում:
Քրեական գործի նախապատրաստման ընթացքում ստացականը ենթարկվել է դատաձեռագրաբանական փորձաքննության, եւ փորձագետը տվել է եզրակացություն, համաձայն որի՝ Զարուհին ինքն է ստորագրել եւ գրել, գրառումները նրանն են:
«Քննությանը վերաբերող այլ տվյալներ չեն հայտնաբերվել»,- գրել էր քննիչն իր որոշման մեջ, ապա նաեւ ակնարկել, որ այս վեճը ենթակա է քաղաքացիաիրավական հարաբերությունների համատեքստում լուծվելու:
Քրեական գործ չի հարուցվել՝ Արփինե Մայսուրյանի արարքում հանցակազմի բացակայության հիմքով:
Զարուհի Պողոսյանը դիմել էր Կենտրոն եւ Նորք-Մարաշ վարչական շրջանների ընդհանուր իրավասության դատարան, առքուվաճառքի գործարքն անվավեր ճանաչելու եւ բնակարանից վտարելու պահանջի մասին հայցով:
Այս գործով երրորդ անձ էր ճանաչվել Կենտրոն նոտարական գրասենյակի նոտար Մարինե Մանուկյանը:
Ըստ հայցվորի, չորս տարի առաջ իր վաճառած բնակարանի արժեքը կազմել է 10.180.000 դրամ, եւ դա եղել է կողմերի համաձայնությամբ: Հայցվորը պնդում է, որ «Չնայած պայմանագիրը վավերացվել է նոտարական կարգով եւ պայմանագրում առկա է բնակարանի արժեքը, սակայն պատասխանողը նշված գումարը ինձ չի տվել, ցանկանում է բնակարանը շտապ վաճառել եւ խաբեությամբ տիրանալ իմ գույքին»:
Խոսքը մինչեւ քսանութ հազար դոլար արժողության բնակարանի մասին է, ըստ հայցվորի, իրեն Արփինեն տվել է հինգ հարյուր դոլար գումար, իր վստահությունը ձեռք բերելու համար:
Արփինե Մայսուրյանը տեղեկացնում է, որ Զարուհի Պողոսյանը ոստիկանություն է դիմել մեկ տարի հետո, ինչը խոսում է նրա ասածների անարժանահավատության մասին:
Բացի դա, գործում առկա դատաձեռագրաբանական փորձաքննության եզրակացությամբ հաստատվել է, որ ստացականն ամբողջությամբ գրվել է Զարուհի Պողոսյանի կողմից, եւ որ երեսուն հազար դոլար գումար է Արփինեի հայրն Ուկրաինայից ուղարկել, եւ դրանով է գնվել բնակարանը:
Այս գործով փորձ են արել Արփինեի հետ կապել մի տղայի անուն. որը, պարզվել է, նշանված չի եղել հետը եւ ընդհանրապես կապ չի ունեցել բնակարանի գնման հետ:
Արփինե Մայսուրյանը «Առավոտի» հետ զրույցում նաեւ հայտնեց, որ ոստիկանությունում իրեն մի քանի օր պահելով՝ հորդորում էին, որ ասի, թե բնակարանի գումարը ինքը չի տվել, եւ բաց կթողնեն:
Գործը գտնվում է դեռ դատարանում, բնակարանից վտարելու պահանջի մասին հայցը մեկ անգամ մերժվել է, հասել Վճռաբեկ դատարան:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
12.09.2014
