Եվրամիությունը սեպտեմբերի 12-ին Ռուսաստանի նկատմամբ նոր պատժամիջոցներ է սահմանել: Այս անգամ սահմանափակումների տակ են ընկել նավթային և ռազմական ոլորտների ընկերությունները, երկակի նշանակության ապրանքները, զգայուն տեխնոլոգիաները, ինչպես նաև մի քանի ֆիզիկական անձիք: Հայտնում է «ՌԻԱ Նովոստի»-ն:
ԵՄ պաշտոնական տեղեկագրքում հրապարակված պատժամիջոցների ցուցակում նշված է, որ նավթային ընկերություններից սահմանափակվել է «Օբորոնպրոմ»-ի, «Ռոսնեֆտ»-ի, «Տրանսնեֆտ»-ի, «Գազպրոմ նեֆտ»-ի մուտքը եվրոպական շուկա:
Պատժամիջոցներ են կիրառվել ռազմական ոլորտի 9-ը ընկերությունների նկատմամբ, այդ թվում՝ «Կալաշնիկով»-ի, «Սիրիուս»-ի, «Տուլայի զինագործարան»-ի, «Ստանկոինստրումենտ»-ի, «Խիմկոմոզիտ»-ի, «Տեխնոլոգիե մաշինոստրոենիե»-ի, «Վիսոկոտոչնիե կոմպլեքսի»-ի, «Ալմազ-Անտեյ»-ի և «Բազալտ»-ի նկատմամբ:
ԵՄ պատժամիջոցների ցուցակում է հայտնվել 24 հոգի՝ Դոնեցկի ինքնահռչակ հանրապետության ղեկավարները և ռուս պաշտոնյաներ և պատգամավորներ:
Կարդացեք նաև
Ռուսաստանի արտաքին գործերի նախարար Սերգեյ Լավրովն արձագանքել է նոր պատժամիջոցներին՝ ասելով, որ ԵՄ-ի Ռուսաստանի դեմ հերթական այս քայլը խաթարում է Ուկրաինայի հակամարտությունը խաղաղ ճանապարհով կարգավորելու ջանքերը:
«Նման պահին, երբ խաղաղ կարգավորման գործընթացը ամրապնդվում է, այդպիսի որոշումները ճանապարհ են բացում ձախողելու խաղաղ կարգավորման գործընթացը», – ասել է Լավրովը «Ռոսիա 1» հեռուստակայանին:
Պատրաստեց Հովհաննես ԻՇԽԱՆՅԱՆԸ
