«Տեսնում եմ ազդակներ, որ Քառյակը ինչ-որ ձևով իր ձևաչափը կփոխի. կդառնա եռյակ կամ երկյակ»,-այսօր «Զարկերակ» մամուլի ակումբում, ամփոփելով օգոստոսի 8-17-ը «GALLUP International association»-ի հայաստանյան ներկայացուցչության կողմից 1067 անձի շրջանում իրականացված հարցման արդյունքները, նշեց կազմակերպության տնօրեն Արամ Նավասարդյանը: Ըստ նրա` «ժողովուրդը լավ հիշում է բոլոր քաղաքական ուժերի պահվածքն ու ցույց տված արդյունքները նախագահական և խորհրդարանական ընտրությունների ժամանակ»:
Արամ Նավասարդյանի ներկայացմամբ` հարցման արդյունքներով՝ Քառյակից սպասելիքները հասարակության շրջանում այսպիսին են. «Հարցվածների 71%-ը նշել է, որ իշխանությունը չի իրականացնի իր դեմ դրված պահանջները: Ոչ իշխանական ուժերի հետագա վարքագծի վերաբերյալ` հարցվածների 51 %-ը կարծում է, որ քառյակի գործողությունները, պայքարը կլինեն թույլ, 23 %-ը կարծում է, որ քառյակի մասնակիցները կգնան թաքնված բանակցությունների իշխանության ներկայացուցիչների հետ, որը կտապալվի, 9 %-ը նշել է, որ քառյակը ունակ կլինի, համախմբել մեծ թվով մարդկանց և հասնել իշխանափոխության»: Մեկնաբանելով ստացված արդյունքները` Արամ Նավասարդյանը նշեց. «Մենք կարող ենք ֆիքսել, որ դեպի բանակ մեծ վստահություն ունենք, ինչը չես ասի քաղաքական դաշտի մասին, և կարծում եմ` մեր հանրությունը ճիշտ դատողություններ է արել: Հիմա բոլորս էլ գիտենք, որ որոշակի խժդժություններ են սկսել քառյակի մեջ. մի ուժը համաձայն չէ ինչ-որ խնդրի վերաբերյալ, մյուսը պասիվացել է և այլն»:
Թեժ աշնան մասին քառյակի կողմից հնչող հայտարարություններին ի պատասխան Արամ Նավասարդյանը հեգնում է. «Թեժ աշուն, թեժ ձմեռ, թեժ Հնդկաստան, թեժ Պարսկաստան, ո՞ւր է» : Պարոն Նավասարդյանը նաև կասկածներ ունի, որ քառյակը ուղղորդված է ինչ-որ ուժի կողմից, սակայն չցանկացավ մանրամասնել:
Տաթև ՀԱՐՈՒԹՅՈՒՆՅԱՆ
Կարդացեք նաև
