«Սահմանադրական բարեփոխումները բացարձակապես անհրաժեշտ չեն, որպեսզի Ընտրական օրենսգրքով անցնենք 100 տոկոս համամասնական ընտրակարգի կամ ընդդիմությանը տրվեն վերահսկման լծակներ: Այնպես որ թող դեմագոգիայով չզբաղվեն նրանք, ովքեր ամեն բան կապում են այս բարեփոխումների հետ: Խնդիրը միայն այն է` կա՞ քաղաքական կամք՝ արատները վերացնելու, թե՞ ոչ, առավել ևս, որ որևէ երաշխիք չկա, որ նույն վիճակը չի լինի փոփոխություններից հետո»,- խորհրդարանական ճեպազրույցներում հայտարարեց ԲՀԿ խմբակցության քարտուղար Նաիրա Զոհրաբյանը` նշելով, որ մինչ լրագրողների հետ հանդիպելը ընթերցել է ընդամենը մեկ տարի առաջվա ՀՀԿ հայտարարությունն այն մասին, որ իրենք դեմ են սահմանադրական բարեփոխումներին:
Լրագրողներից մեկի դիտարկմանն ի պատասխան, որ Գագիկ Ծառուկյանի հարցազրույցում իրենց որոշ գործընկերներ տարակարծություն են նկատել` Ծառուկյանի խոսքի ու թիմի տեսակետներում, Նաիրա Զոհրաբյանն ընդգծեց, որ տարակարծություն չկա. «Անհասկանալի է, թե ինչո՞ւ են մեր գործընկերները տարակարծություն տեսել, քանի որ բոլորը դրանում համոզվել են, որ Գագիկ Ծառուկյանի այո-ն այո է, իսկ ոչ-ը` ոչ: Մենք չենք ասում փաթեթը լավն է կամ լավը չի, մենք ասում ենք, որ այսօր, երբ նման արտագաղթ կա, ու երկրում ավելի լուրջ խնդիրներ կան, առավել ևս հավատի դեֆիցիտ, արդյո՞ք թիվ մեկ խնդիրը սահմանադրության փոփոխությունն է: Խոսքն ընդամենը ճիշտ պահի ընտրության մասին է»:
Ինչ վերաբերում է հնարավոր արտահերթ ընտրություններին, ապա Նաիրա Զոհրաբյանը նկատեց, որ կուսակցությունը ելնում է զուտ սահմանադրական ժամկետներից, սակայն իրենք պատրաստ են ցանկացած ֆորսմաժորային իրավիճակի:
Նելլի ԳՐԻԳՈՐՅԱՆ
