Կապանի բժշկական կենտրոնի ինֆեկցիոն բաժանմունքի վարիչի ժամանակավոր պաշտոնակատար Մարինե Քոչարյանի փոխանցմամբ Կապանի հիվանդանոցում գտնվող Քաջարան քաղաքի բնակիչներից 4-ն արդեն վաղը դուրս կգրվեն, նրանց անալիզների արդյունքներում վտանգավոր ոչինչ չի հայտնաբերվել: «Հիվանդների մոտ ախտածին մանրէներ չեն հայտնաբերվել, աղիքային վարակիչ հիվանդությունը բացառվում է: Շարունակաբար դուրս կգրվեն նաեւ մյուս հիվանդները, կարգի համաձայն՝ կրկնակի հետազոտության նյութ ենք վերցնում ու դուրս գրում հիվանդանոցից », – նշեց բժշկուհին:
Հիշեցնենք, որ սեպտեմբերի 5-ից մինչ սեպտեմբերի 9-ը սրտխառնոցով, գլխացավով, մկանացավերով, փորլուծության եւ ջերմության գանգատներով Կապանի հիվանդանոց են տեղափոխվել Քաջարան քաղաքի 8 բնակիչ եւ 3 բնակիչ էլ` Կապան քաղաքից: Մինչեւ օրս դեռեւս հստակ չի նշվում, թե ինչն է եղել դրա պատճառը: ՀՀ առողջապահության նախարարության պետական հիգիենիկ և հակահամաճարակային տեսչության «Սյունիքի մարզային փորձագիտական կենտրոն» պետական ոչ առևտրային կազմակերպությունից տեղեկացրել էին, որ Քաջարան ու Կապան քաղաքների ջրերից վերցված նմուշներում շեղումներ չեն հայտնաբերվել, մաքուր է եղել:
Կապանի հիվանդանոցի ինֆեկցիոն բաժանմունքի վարիչի ժամանակավոր պաշտոնակատար Մարինե Քոչարյանը չժխտեց, որ հնարավոր է սննդի հետեւանքով է բնակիչների մոտ նման խնդիր առաջացել, թեեւ յուրաքանչյուրը տարբեր սնունդ էր օգտագործել:
«Ոչ ճիշտ ջերմամշակման ենթարկված կամ ոչ ճիշտ պայմաններում պահպանված սննդի օգտագործումից կարող է նման խնդիր ծագել… », -ավելացրեց Մարինե Քոչարյանը:
Մերի ՍՈՂՈՄՈՆՅԱՆ
