Խորհրդարանական հաշվիչ հանձնաժողովը նիստ է գումարել :
Այսօր խորհրդարանական հաշվիչ հանձնաժողովը նիստ է գումարել: Հանձնաժողովի նախագահ է ընտրվել ՀՀԿ-ական Սուքիաս Ավետիսյանը, որը նախորդ նստաշրջանում եւս զբաղեցնում էր հանձնաժողովի նախագահի պաշտոնը: Հանձնաժողովի քարտուղար է ընտրվել դարձյալ ՀՀԿ-ական Արայիկ Հովհաննիսյանը:
Ընդդիմությունը, հիշեցնենք, հրաժարվեց ԱԺ հաշվիչ հանձնաժողովում ներկայացուցիչներ ունենալուց: Այդ խնդիրն առաջացավ դեռ նախորդ տարի դեկտեմբերին`«Հայռուսգազարդի» 20 տոկոս բաժնեմասի օտարման եւ 300 միլիոն պարտքի օրինականության հարցերի քվեարկության ժամանակ: Այն ժամանակ ընդդիմադիրները պնդեցին, որ քվեարկության արդյունքերը խեղաթյուրվել են, իսկ հետագա զարգացումները հանգեցրին նրան, որ ընդդիմադիրները հրաժարվեցին հանձնաժողովում ներկայացուցիչ ունենալուց:
Այնուհետեւ, քաղաքական մեծամասնությունն ԱԺ կանոնակարգ-օրենքում փոփոխություններ «սղղացրեց»`հանձնաժողովում ՀՀԿ-ի տեղերն ավելացնելով, որպեսզի կարողանան նիստերում քվորում ապահովել: Հանձնաժողովի 13 անդամներից 7-ը ՀՀԿ-ականներ են:
Կարդացեք նաև
Aravot.am-ի հետ զրույցում Սուքիաս Ավետիսյանը չհամաձայնեց, որ հանձնաժողովի որոշումներն արդեն իսկ լեգիտիմ չեն: «Ցանկալի է, որ բոլոր քաղաքական ուժերը մասնակցություն ունենան մեր հանձնաժողովի աշխատանքներին, որպեսզի ավելորդ շահարկումներ, ավելորդ խոսակցություններ չլինեն: Բայց եթե իրենք ցանկություն չունեն մասնակցելու հանձնաժողովի աշխատանքներին, դա չի նշանակում, որ մենք չպետք է հանձնաժողով ունենանք ու խաթարենք ԱԺ-ի բնականոն աշխատանքը»,- ասաց նա:
Դիտարկմանը`ստացվում է կոմունիստական, միակուսակցական ժամանակների՞ն ենք վերադառնում, մեր զրուցակիցը հակադարձեց. «Կոմունիստական ժամանակներին չենք վերադառնում: Փորձում ենք ապահովել խորհրդարանի բնականոն աշխատանքը: Ընդդիմությանը կրկին հորդորում եմ մասնակցություն ունենալ, ուզում ե՞ն, թող ամբողջ գործընթացն իրենք վերցնեն իրենց ձեռքը, որպեսզի հետագա որեւէ քվեարկության ժամանակ չփորձեն անտեղի շահարկել, թե ձայները ճիշտ չեն հաշվվել: Ես ուզում եմ, որ իրենք մասնակցեն, եթե իրենք չեն ուզում`իրենց խնդիրն է»:
Նելլի ԳՐԻԳՈՐՅԱՆ
