Այսօր կառավարության նիստին քաղաքաշինության նախարար Նարեկ Սարգսյանը պետական ծառայողներին մատչելի բնակարաններով ապահովման ծրագրի ներկայացման ժամանակ բնակարանների մեկ քառակուսի մետրի արժեքը սխալ ասաց: Նախարարը որոշման նախագիծը կարդում էր, եւ հենց կառավարություն ներկայացրած փաստաթղթում էլ սխալ էր գրված: Նիստը վարող ՀՀ վարչապետ Հովիկ Աբրահամյանը Նարեկ Սարգսյանին ուղղեց, ինչից հետո պարոն Սարգսյանը փորձեց արդարանալ, թե խմբագրական սխալ է: Իսկ վարչապետը նկատեց՝ «Չե՞ք կարդում նախագծերը»: «Խմբագրական սխալ է»,-արդարացավ Նարեկ Սարգսյանը:
Ադոնցի փողոցում կառուցվող այդ շենքի բնակարանների գինը փոխվել է՝ 1 քմ միջին գինը ողջ շենքի մասով ավելացել է, կազմելով 297 830 դրամ՝ որոշմամբ հռչակված 276 500-ի փոխարեն: Նարեկ Սարգսյանն, ամփոփելով, պետք է գինն ասեր 297 830 դրամ, սակայն, կարդալով ձեռքի տակ եղած փաստաթուղթը, որտեղ սխալ էր գրված քմ-ի արժեքը, ասաց՝ 276 501 դրամ:
Նելլի ԲԱԲԱՅԱՆ
