ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Համաշխարհային բանկի տարածաշրջանային տնօրեն Հենրի Քերալին եւ ՀԲ երեւանյան գրասենյակի նորանշանակ ղեկավար Լաուրա Բեյլիին:
Փոխվարչապետը շնորհավորեց տիկին Բեյլիին՝ պաշտոնի ստանձնման կապակցությամբ եւ հաջողություն մաղթեց հետագա աշխատանքներում: Ա. Գեւորգյանի խոսքով՝ Համաշխարհային բանկը Հայաստանի ամենախոշոր գործընկերներից է, որի հետ տարիների ընթացքում կառուցողական եւ արդյունավետ փոխգործակցություն է ձեւավորվել եւ որի աջակցությամբ ծրագրեր են իրականացվել գրեթե բոլոր ուղղություններով: «Տարիների ընթացքում այդ ծրագրերի բովանդակությունը փոխվում է, եւ ներկայումս բոլոր ծրագրերն ուղղված են առաջին հերթին Հայաստանի տնտեսության, հանրային հատվածի զարգացման, պետական կառավարման համակարգի արդյունավետության բարձրացմանը»,-ընդգծեց փոխվարչապետը:
Նա նկատեց, որ վարկային եւ դրամաշնորհային ծրագրերի նկատմամբ ավելացել է հանրային հետաքրքրությունն ու վերահսկողությունը, ինչպես նաեւ ծրագրերն իրականացնողների ու շահառուների պատասխանատվությունը: Փոխվարչապետը նաեւ ընդգծեց, որ կառավարությունը կարեւորում է բոլոր այդ ծրագրերի՝ հանրային հատվածի ներգրավմամբ իրականացումը:
Լաուրա Բեյլիին իր հերթին նշեց, որ ուրախ է ստանձնել երեւանյան գրասենյակի ղեկավարի պաշտոնը՝ հաշվի առնելով ձեւավորված փոխգործակցության մակարդակը: «Որպես ՀԲ երեւանյան գրասենյակի ղեկավար՝ իմ նպատակն է լինելու ՀԲ խմբի լավագույն փորձը Հայաստան բերելը, ինչպես նաեւ ձեւավորված փոխգործակցության շարունակումն ու ընդլայնումը»,-ասաց տիկին Բեյլին:
Կարդացեք նաև
Կողմերն այնուհետեւ քննարկեցին ՀԲ աջակցությամբ տարբեր ոլորտներում իրականացվող ընթացիկ եւ ապագա ծրագրերի հետ կապված հարցեր: Մասնավորապես անդրադարձ եղավ տեղական տնտեսությունների եւ զբոսաշրջության զարգացման, առողջապահական հաստատությունների արդիականացման եւ համայնքներում իրականացվող այլ ծրագրերի ընթացքին: Հյուրերը պատրաստակամություն հայտնեցին աջակցել նաեւ առաջիկայում ձեւավորվելիք Տարածքային զարգացման հիմնադրամի գործունեությանը:
Տարածքային կառավարման նախարարության հասարակայնության հետ կապերի բաժին
