Տավուշի մարզում 3 ամիս անձրեւներ չեն տեղացել: Այդ պատճառով դաշտերում, անտառներում հողի մեջ խորը ճեղքեր են գոյացել: Աննախադեպ չորային եղանակի պատճառով մարզում հրդեհները շարունակվում են:
Ադրբեջանին սահմանակից, 1950 բնակիչ ունեցող Մովսես գյուղում մշակելի է 650 հա հողատարածք, նույնքան հողատարածք հայ-ադրբեջանական հակամարտության հետեւանքով չի մշակվում: Մովսեսցիները մշակում են հացահատիկ, եգիպտացորեն, լոբի:
Մովսեսի գյուղապետ Արարատ Ավալյանն ասաց, որ այս տարի մշակել են 210 հա ցորեն, 15 հա գարի: Գյուղի հողերը չեն ոռոգվում, երաշտի պատճառով հացահատիկի բերքը սակավ է եղել` հեկտարից 10-15 ցենտներ: Գյուղապետը հայտնեց, որ գյուղի խմելու ջրագծի ակունք հանդիսացող աղբյուրների ցամաքելու պատճառով մոտ երկու ամիս է` խմելուջրագիծը չի գործում:
Մովսեսցիները ջուր են կրում գյուղի տարածքում գտնվող մի քանի աղբյուրից: Ա. Ավալյանն ասաց. «Խմելու ջուրը նվազել է, այժմ կարելի է ասել`չունենք: Ջուրը կանիստրով ենք կրում, կժերը վերացել են »:
Կարդացեք նաև
Գյուղի ներքին հատվածում գտնվող 16 ջրաղբյուրներից մնացել է 2-3 –ը , մնացածը չորացել է: 4 օրը մեկ մովսեսցիներին ջուր է մատակարարվում` կենցաղային կարիքների եւ տնամերձ հողամասերը ոռոգելու համար:
Ոսկան ՍԱՐԳՍՅԱՆ
