2015 թվականի բյուջեի խոշորացված ցուցանիշներով, որը կառավարությունն արդեն ներկայացրել է` որպես նախնական տարբերակ, նախատեսվում է հարկեր եւ տուրքեր հավաքագրել 1 տրիլիոն 184 միլիարդ դրամ, ինչը նախորդ տարվա ցուցանիշից 49 միլիարդ դրամով ավելի է: Սա, ըստ տնտեսագետների, ցածր ցուցանիշ է` համեմատած վերջին տարիների հետ:
Ազգային ժողովի տնտեսական հարցերի մշտական հանձնաժողովի նախագահ, հանրապետական պատգամավոր Վարդան Այվազյանից այսօր «Հենարան» ակումբում լրագրողները հետաքրքրվեցին, թե բյուջեի քիչ հավաքագրման պատճառը ո՞րն է, գուցե` ստվերի դեմ պայքարի վրա հույս չեն դնում:
Պարոն Այվազյանն ասաց` քանի որ 2015 թվականի բյուջեի փաստաթուղթը դեռ նախնական տարբերակն է, հստակ բան չի կարող ասել, բայց երբ այն մտնի ԱԺ՝ մանրամասն կքննարկեն, եւ այդ թվերը դեռ փոփոխվելու են:
Վարդան Այվազյանի խոսքերով` «Ես գտնում եմ, որ ստվերի դեմ պայքարը շարունակվում է, բարեփոխումներ են կատարվում, փաստաթղթաշրջանառության խստացումը արդյունք կտա: Այնպես չէ, որ երեկվա ցանած հատիկը վաղը ցորեն է դառնալու»:
Մեր ճշտող հարցին` գուցե արտագաղթը կամ բիզնեսի պակասությունն է պատճառը, որ քիչ հարկ են հավաքելու, պատգամավորն ասաց, որ 49 միլիարդ դրամը, այսինքն` 100 միլիոն դոլարից ավելի գումարի հավաքագրումը մեր այսօրվա տնտեսության համար նույնիսկ շատ է. «Այն դեպքում, երբ վերջին տարիներին մոտ 8 հազար տնտեսվարող` խանութներ եւ այլն, փակվել են, ի՞նչ անենք, հարկային բեռն ավելացնենք, որ մնացածնե՞րն էլ փակվեն: Ավելի լավ է տնտեսական ակտիվությունը բարձրացնել, քան` հարկային բեռն ավելացնել»:
Կարդացեք նաև
Պարոն Այվազյանի խոսքերով` երբ նախորդ տարի 25 միլիարդ դրամի չափով ավելացրեցին հարկերը, տնտեսվարողներն ասում էին` «Մեզ մորթեցիք»:
Մանրամասն` տեսանյութում:
Նելլի ԲԱԲԱՅԱՆ
Դե Վարդան Այվազյանի նման մտքի ԳԻԳԱՆՏԸ որ ասում է………………………Քիչ գրեք այս մարդու ԱՇԽԱՐՀԱՑՈւՆՑ մտքերը…………..