Հայաստանի Հելսինկյան կոմիտեի նախագահ Ավետիք Իշխանյանի համոզմամբ` Սուրիկ Խաչատրյանին նորից Սյունիքի մարզպետ նշանակելը Հայաստանի իշխանությունների կողմից հասարակությանը ձեռնոց նետել կնշանակի:
«Դա նույնն է, որ ձեռնոց նետեն ու ասեն, եթե մարտահրավերը չընդունես, եթե չմենամարտես, ուրեմն ստրուկ ես: Կվերցնե՞նք այդ ձեռնոցը, թե՞՝ ոչ, դրանից կհետեւի Հայաստանը` որպես պետություն, արժանի է լինելու, թե՞՝ ոչ»,- այսօր «Հայելի» ակումբում ասաց իրավապաշտպանը:
Նա պատմեց, որ Սյունիքի մարզի մի քանի քաղաքների բնակիչների հետ կապեր ունի, ու բոլորը իրեն ոգեւորված պատմել են, որ Սուրիկ Խաչատրյանի պաշտոնանկությունից հետո սկսել են ազատ շնչել, մարզում բնակիչներն արդեն համարձակ խոսում են:
«Սուրիկ Խաչատրյանը վաղուց պետք է ոչ միայն ազատված լիներ մարզպետի պաշտոնից, այլեւ իր նախկին հերոսությունների համար պետք է լիներ ճաղերի հետեւում: Բայց այն, որ դարձավ ՀՀԿ Գորիսի ՀՀԿ շրջանային խորհրդի նախագահ, նշանակում է, որ մեր իշխանությունները կտրված են ժողովրդից»:
Կարդացեք նաև
«Բարեփոխում» հ/կ նախագահ Կարինե Հակոբյանն էլ Սուրիկ Խաչատրյանի հնարավոր վերադարձը համարում է անպատժելիության անսահմանություն. «Անպատժելիությունը այնքան ամբարտավանության մթնոլորտ է ստեղծել, որ նա դեռ համարձակվում է խոսել մարզպետ նշանակվելու մասին:
Արփինե ՍԻՄՈՆՅԱՆ
