ԲՀԿ-ական պատգամավոր Գրիգորի Մարգարյանը
սրտնեղեց Ռոբերտ Քոչարյանին վերաբերող հարցից
– Հովիկ Աբրահամյանի ղեկավարած կառավարությունը հուլիսի 1-ից ստվերի դեմ պայքար է տանում: Արդյունքների ամփոփումներ եղեն, թվեր հրապարակվեցին, օլիգարխներին պատկանող ընկերություններ տույժ ու տուգանքների ենթարկվեցին, խոսվեց ոչ պարտաճանաչ հարկատուների ինչ-որ ցուցակի մասին, որն այդպես էլ չհրապարակվեց եւ այլն: Հետեւե՞լ եք այդ ամենի ընթացքին, ի՞նչ տպավորություններ եք ստացել:
– Ճիշտն ասած՝ ուշադիր չեմ հետեւել:
– Ինչո՞ւ: Ձեզ չէ՞ր հետաքրքրում:
Կարդացեք նաև
– Հետաքրքրում էր, բայց ես հանգստանում էի: Համաձայն օրենքի՝ ամռանը պատգամավորը հանգստանում է, եւ հանգստանալու ընթացքում հնարավոր է, որ շատ ուշադիր չհետեւի տվյալ քաղաքական ընթացքին:
– Այս ամռանն այդքան լարված իրավիճակ էր` կառավարությունը ստվերի դեմ էր պայքարում…
– Լավ է անում, որ պայքարում է: Ողջունում եմ ես այդ աշխատանքը, վստահ եմ, որ կունենա իր արձագանքը, իր հետեւանքները` խոսքիս լավ իմաստով` թե բյուջեի համար, թե…
– Սահմաններին անընդհատ կրակոցներ էին հնչում, արտաքին աշխարհում զարգացումներ էին գնում, որոնք ուղղակիորեն նաեւ Հայաստանին էին վերաբերում. այդ ամբողջը թողած` Դուք հանգստանո՞ւմ էիք:
– Դուք սուտ ինֆորմացիա տարածեցիք հենց նոր: Ես ասացի պարզապես, որ կոռուպցիայի հետ կապված գործընթացին չեմ հետեւել: Ինչ վերաբերում է սահմանների հետ կապված ինչ ա եղել` ես շատ լավ հետեւել եմ: Ու խնդրում եմ, որ հարցը տալիս եք, ձեզանից մի հորինեք:
– Իսկ Ձեր կարծիքով՝ ի՞նչ էր ուզում Ադրբեջանը, ինչո՞ւ էր անընդհատ ինչ-որ սադրանքների դիմում:
– Դուք չգիտե՞ք` ի՞նչ էր ուզում:
– Ձեր գնահատականներն են հետաքրքիր:
– Ինչ որ ուզում էր` ստացավ Ադրբեջանը: Եթե ձեզ հետաքրքրում է մանրամասները` կարող եք ԶԼՄ-ները բացել` կարդալ: Ինչ ուզում էր Ադրբեջանը, ի վերջո, ստացավ:
– Ադրբեջանն ուզում էր, որ Հայաստանից ապտա՞կ ստանա:
– Երեւի:
– Իսկ պատգամավորական խմբերի հետ սահմաններ այցելե՞լ եք:
– Ճիշտն ասած` չէ: Ինձ չեն հրավիրել: Չի եղել նման բան, որ ինձ կանչեն, հրավիրեն` չգնամ:
– Ձեր նախաձեռնությամբ է՞լ չեք գնացել…
– Գիտեք ինչ, դա իմ նախաձեռնությունով չի կարա լինի: Ըստ երեւույթին, պաշտպանության, ներքին գործերի եւ ազգային անվտանգության հանձնաժողովի ժողովուրդը մի քիչ ավելի են գնում: Իմ հանձնաժողովը եվրաինտեգրման հանձնաժողովն ա եւ հանձնաժողովով կամ ԱԺ-ից ինչ-որ որոշումով, որ պետք է գնան սահման` նման բան չի եղել: Ամեն դեպքում, ես հրավեր չեմ ստացել:
– Ստվերի դեմ պայքար սկսելուց հետո վարչապետ Հովիկ Աբրահամյանը հայտարարեց, որ հարյուր օրը քիչ է այդ գործի համար եւ իրեն էլի ժամանակ է պետք: ՀԱԿ-ից անմիջապես ԲՀԿ-ին, որը կարծում էր, թե Հովիկ Աբրահամյանին աշխատելու ժամանակ է պետք տալ, հիշեցրին, որ իրենք ի սկզբանե էլ չեն հավատացել Հովիկ Աբրահամյանին: Այս հակասությունը նկատի ունենալով` խորհրդարանական քառյակի շրջանակներում ՀԱԿ-ն ու ԲՀԿ-ն ինչքա՞ն ճանապարհ ունեն միասին անցնելու:
– Ես չգիտեմ, թե ինչքան ճանապարհ ունեն անցնելու: Նմանատիպ հարցերով ես կխնդրեի, որ հարցադրում անեիք ֆրակցիայի կամ կուսակցության ղեկավարին: Ես չեմ կարծում, որ իմ պատասխանելը ճիշտ է:
– Քաղաքական գործընթացներին չե՞ք ուզում խառնվել:
– Սկսենք նրանից, որ ես կուսակցության անդամ էլ չեմ, ֆրակցիայի անդամ եմ: Եթե կուսակցության անդամ չեմ, նշանակում է, որ որոշակի կառույցներ, որը կուսակցությունն ունի, ես ընդգրկված չեմ:
– Ֆրակցիաներն են համագործակցում:
– Ես համագործակցությանը չեմ մասնակցել, չեմ կարող այդ հարցին պատասխանել: Հարցը տվեք այն մարդուն, ով իրավասու է դրան պատասխանել:
– Մի քանի օր առաջ ՀՀ երկրորդ նախագահ Ռոբերտ Քոչարյանը հերթական հարցազրույցով հանդես եկավ, որտեղ կարմիր թելի պես անցնում էր այն միտքը, որ Ռոբերտ Քոչարյանի իշխանության տարիները Հայաստանի համար դրախտային էին: Դուք այդ տարիներին եւս ակտիվ գործունեությամբ եք զբաղվել, նաեւ տնտեսական: Իսկապե՞ս այդ տարիներն ամենալավն էին Հայաստանի համար:
– Զուտ Հայաստանի մասին եկեք չխոսենք, այդ հարցին մի քիչ գլոբալ նայենք: Կարծում եմ՝ չեք մոռացել, որ 2008 թվականին ճգնաժամ սկսվեց, իսկ Ռոբերտ Քոչարյանի վարած նախագահական ընթացքը եղել է մինչեւ այդ: Ամբողջ աշխարհի առումով, այո, վիճակը շատ ավելի լավ էր, քան 2008 թվականից հետո. եւ Հայաստանում, եւ ՌԴ-ում, եւ ԱՄՆ-ում՝ որ երկիրը որ կուզեք: Իսկ հաշվի առնելով նաեւ, որ մեր երկիրը փոքր երկիր է եւ տնտեսական առումով ազդեցությունները մի քիչ ավելի շուտ են անդրադառնում, բնական է, տնտեսական առումով մեր երկիրն այս պահին, ինչպես ամբողջ աշխարհում վիճակը, այնպես էլ մեզ մոտ մի քիչ կարող է ավելի ցածր տեմպերով զարգանա:
– Երկրորդ նախագահը, փաստորեն, փորձում է խեղաթյուրե՞լ իրավիճակը, քանզի համաշխարհային զարգացումներին չի անդրադառնում…
– Գիտեք ի՞նչ հարցեր եք տալիս (թափահարում է օձիքը-Ն. Գ.), ոնց որ լինում են՝ քթի մազ քննիչներ: Տեսե՞լ եք նման բան, փորձում են մի հատ ծուղակի մեջ մտցնեն, հարց են տալիս, որ մի բան պոկեն բերանից: Ոչ: Երկրորդ նախագահն ինչ որ ասում է, ինքն իր կարծիքն է ասում: Լավ է անում՝ ասում է: Ես չեմ գտնում, որ ես պիտի որակավորում տամ, թե երկրորդ նախագահը ոնց է ղեկավարել: Ղեկավարել է նորմալ: Ոչ մի ըտենց բան չեմ տեսնում, առավել եւս այդ ժամանակ ես աշխատել եմ երկրորդ նախագահի հետ, եղել եմ կոալիցիայի անդամ եւ այլն:
– Ինչպե՞ս եք գնահատում Ռոբերտ Քոչարյանի իշխանության տարիները:
– Նորմալ:
– Ռոբերտ Քոչարյանը չէր բացառել, որ հանգամանքներով պայմանավորված՝ կրկին կարող է հավակնել իշխանության…
– Նշանակում է` հանգամանքներով պայմանավորված:
– Իսկ Դուք կցանկանա՞ք, որ Հայաստանի հաջորդ նախագահը կրկին լինի Ռոբերտ Քոչարյանը:
– Իմ ուզելով չի:
– Իբրեւ ընտրող:
– Երբ որ ժամանակը կգա, կլինեն թեկնածուներ, թեկնածուների մեջ որ լինի Ռոբերտ Քոչարյանը, կարծում եմ՝ ավելի կոռեկտ կլինի, որ այդ հարցն այն ժամանակ տաք:
Զրույցը`
ՆԵԼԼԻ ԳՐԻԳՈՐՅԱՆԻ
«Առավոտ» օրաթերթ
09.09.2014
