Ճանաչված փաստաբան Ռոբերտ Պողոսյանը իր հերթական՝ «Իմացապաշտություն» գիրքն է ներկայացրել ընթերցողին: Այն «Մատյան հիշողությունների», «Դիլիջանյան խճանկար» եւ «Հուշամատյան 2» գրքերից հետո թվով չորրորդն է: Գրքում տեղ են գտել հեղինակի 100-ի հասնող աֆորիզմները եւ գրքի հասցեատերն առաջին հերթին, ըստ հեղինակի՝ երիտասարդությունն է: Ի պատիվ միջնադարի հայտնի մտածող Մխիթար Գոշի, 800-ամյակի առթիվ Գոշավանքում նրա հիշատակը հավերժացրած արձանաքանդակը տեղ է գտել գրքի կազմին: Փաստաբանի աֆորիզմներն ու ասույթները դատարանների, իրավական համակարգի ծաղկաքաղ են: «Բոլոր մահկանացուներն ունեն սխալվելու իրավունք, բայց սխալվողներից նա է իմաստունը, ով իր եւ ուրիշների սխալները չի կրկնում: Խելացի մարդիկ սովորում են ուրիշների սխալների վրա, իսկ անխելքները կրկնում են իրենց սխալները»,- ասում է Ռ. Պողոսյանը:
Փաստաբանը նաեւ իր մտորումներն է գրել գործող օենսգրքերի հետ կապված, մասնավորապես՝ «Քրեական օրենսգրքով չնախատեսված ամեն մի հակաօրինական գործողություն՝ անգործություն, ինքնին չի կարող առաջացնել հանցակազմ: Լավ կլիներ, եթե անմեղությունը նույնքան հովանավորություն գտներ, որքան հանցանքը»: Ըստ նրա՝ օրինավոր դատավորը նա է, ով պաշտոնաթողումից տարիներ անց, անգամ երազներում վերապրում, նախագահում է դատավարություններ, մտովի կայացնում վճիռներ, դատավճիռներ, որոշումներ:
Ռ. Մ.
«Առավոտ» օրաթերթ
09.09.2014
