«Հաշվի առնելով, որ մի շարք մեքենայություններ տեղի ունեցան տարբեր ընտրական գործընթացների ժամանակ, մենք արդեն հայտարարել ենք, որ ՀԱԿ-ը հաշվիչ հանձնաժողովում իր ներկայացուցչին չի ուղարկելու եւ չի մասնակցելու ապօրինություններին եւ ընտրակեղծարարությանը»,- այսօր ԱԺ-ում ԱԺ ժամանակավոր հաշվիչ հանձնաժողովի կազմի հետ կապված հարցի քննարկման ժամանակ այսպիսի հայտարարությամբ հանդես եկավ ՀԱԿ խմբակցության ղեկավար Լեւոն Զուրաբյանը:
Նրան հետեւեց Նաիրա Զոհրաբյանի հայտարարությունը. «Քանի դեռ ՀՀ ԱԺ-ում հաշվիչ հանձնաժողովի կազմը թելադրում է մեկ քաղաքական ուժի դոմինանտություն, խախտելով բազմակարծությունը, ԲՀԿ-ն եւս շարունակելու է այս հաշվիչ հանձնաժողովում չներկայացնել որեւէ ներկայացուցիչ»:
«Ժառանգություն» խմբակցության ղեկավար Ռուբիկ Հակոբյանը նույնպես միացավ այս հայտարարություններին՝ ասելով. «Մենք մեր դիրքորոշումը եւս չենք փոխել: Ցավոք քաղաքական մեծամասնությունը որեւէ քայլ չարեց, որ կարողանար բալանսավորված հակակշիռ ապահովող հանձնաժողով ունենար: Մենք անդամ չենք ունենալու հաշվիչ հանձնաժողովի կազմում»:
ԱԺ փոխխոսնակ Էդուարդ Շարմազանովը արձագանքեց Նաիրա Զոհրաբյանի խոսքերին եւ հակադարձեց. «Բոլոր ժողովրդավարական երկրների պառլամենտերում դոմինանտ է մեծամասնությունը»:
Հռիփսիմե ՋԵԲԵՋՅԱՆ
Կարդացեք նաև
