Երեկ ժամը 22.50-ի սահմաններում կենցաղային վիճաբանության պատճառով սպանություն է տեղի ունեցել Շիրակի մարզի Մարալիկ քաղաքի Շիրակի փողոցում: 1980 թվականին ծնված Վահրամ Վարդևանյանը խոհանոցային դանակով սպանել է հորը`1959 թվականին ծնված Հարութ Վարդևանյանին, դանակով հարվածել է որովայնին, որն էլ տեղում մահացել է: Այս մասին Aravot.am-ին փոխանցեցին Շիրակի մարզային ոստիկանությունից` հավելելով, որ հայրը հոգեբուժարանում գրանցված հիվանդ է:
Որոշակի մանրամասներ մեզ փոխանցեց նաև Մարալիկի քաղաքապետ Արտակ Գևորգյանը: Նա ևս երեկ եղել էր դեպքի վայրում: Քաղաքապետի ասելով, հայրը 23 տարի գտնվել է հոգեբուժարանում: Սևանի հոգեբուժարանից 3 օր առաջ զանգահարել են Վարդևանյաններին, թե ձեր հիվանդին տուն ենք ուղարկելու: Տնեցիները, թեև դեմ են եղել հոգեբուժարանի այս նախաձեռնությանը, սակայն ստիպված հյուրընկալել են իրենց տան անդամին: Հոգեբուժարանից հիվանդին երեկ բերել են Մարալիկ, հետն էլ դեղորայքի մի հսկա ցանկ, որ պարտադիր պիտի ընդունի:
Ըստ քաղաքապետի, սպանության շուրջ Մարալիկում տարբեր վարկածներ են շրջանառվում: Նախ այն, որ 23 տարի տնից բացակայած ու հոգեկան շեղումներ ունեցող հայրը, ոտք դնելով տուն, փնտրել է իր 5 տարեկան որդուն: Բանն այն է, երբ նրան 23 տարի առաջ տեղափոխել են հոգեբուժարան, որդին 5 տարեկան է եղել, հոր և որդու մեջ վիճաբանությունը ծագել է այս թեմայով:
Սա վարկածներից մեկն է: Մյուս վարկածն այն է, որ սպանությունը կատարվել է խանդի հողի վրա: Հայրը, չճանաչելով այլևս չափահաս դարձած որդուն, կարծել է կնոջ սիրեկանն է ու սկսել է վիճաբանել նրա հետ: Ըստ քաղաքապետի, տղան ևս որոշակի հոգեկան խնդիրներ ունի, ժամանակին աշխատել է շինանյութերի խանութում` որպես բանվոր: Մայրն աշխատում է Մարալիկի հիվանդանոցում` որպես սանիտար: Որդուց բացի, նրանք նաև դուստր ունեն, որը ամուսնացած է Գյումրիում:
Կարդացեք նաև
Ի դեպ, քաղաքապետը նաև ասաց, որ նախքան սպանությունը այս ընտանիքը եկել էր իր հետ հանդիպման, նոր բնակարան էր ստացել Մարալիկում, որոշակի փաստաթղթերի, բնակարանը սեփականաշնորհելու հետ կապված եղել են քաղաքապետի մոտ:
Նունե ԱՐԵՎՇԱՏՅԱՆ
