Հայաստանի Հանրապետության արդարադատության նախարար Հովհաննես Մանուկյանը սեպտեմբերի 5-ին ընդունել է ԱՄՆ միջազգային զարգացման գործակալության հայաստանյան առաքելության ղեկավար Քարեն Հիլիարդի գլխավորած պատվիրակությանը: Նախարարը հյուրերի հետ քննարկել է երկկողմ հետարքրքություն ներկայացնող հարցեր, որոնք, մասնավորապես վերաբերել են հակակոռուպցիոն ռազմավարությանն ու բաց կառավարման գործընկերությանը: Արդարադատության նախարարը նշել է, որ ԱՄՆ ՄԶԳ-ն ՀՀ Կառավարության կարևոր գործընկերներից է, որի հետ երկարամյա համագործակցության ընթացքում իրականացվել են արդյունավետ ծրագրեր ոչ միայն արդարադատության, այլ նաև տնտեսական զարգացման և հասարակական կյանքի այլ ոլորտներում:
Քարեն Հիլիարդը գոհունակություն է հայտնել ՀՀ կառավարության՝ բաց կառավարման գործընկերության համատեքստում իրականացրած աշխատանքներից և ընդգծել, որ միջազգային մյուս գործընկերների համեմատությամբ Հայաստանը առաջատարների շարքում է՝ հավակնոտ նպատակներ ունենալու և դրանց հասնելու առումով: ԱՄՆ ՄԶԳ հայաստանյան առաքելության ղեկավարը կարևորել է քաղաքացիական հասարակության կազմակերպությունների վերաբերյալ գործող օրենսդրության բարեփոխման ուղղությամբ ՀՀ Արդարադատության նախարարության կողմից կատարվող աշխատանքները:
Նախարարի առաջին տեղակալ Արսեն Մկրտչյանը ներկայացրել է քաղաքացիական հասարակության ոլորտում օրենսդրական փոփոխությունների հայեցակարգի հիմնական դրույթները՝ ընդգծելով, որ արդեն վաղուց շրջանառվող հայեցակարգի վերաբերյալ բոլոր սկզբունքային ու գաղափարական մոտեցումները քաղհասարակության ներկայացացուցիչների հետ համաձայնեցված են: Նախարարի տեղակալ Սուրեն Քրմոյանն էլ, խոսելով հակակոռուպցիոն ռազմավարությունից, նշել է, որ այն վերաբերում է բարեխիղճ հանրային ծառայող, արդյունավետ և թափանցիկ կառավարման համակարգ ունենալու հարցերին: Հովհաննես Մանուկյանը նույնպես ընդգծել է քաղաքացիական հասարակության ամրապնդման կարևորությունը և շեշտել, որ ամուր քաղաքացիական հասարակություն ունենալը երկրի իմունիտետն ու ամրության ցուցանիշն է: Նշված ոլորտներում համագործակցելու երկուստեք պայմանավորվածություն է ձեռք բերվել:
Հանդիպմանը մասնակցել են նաև նախարարի տեղակալներ Արման Թաթոյանն ու Արտյոմ Գեղամյանը, ինչպես նաև ԱՄՆ ՄԶԳ ներկայացուցիչներ Արև Մովսիսյանը, Էլիսոն Մքֆարլենդը, Ջոն Լուլեջյանը, Քրիստինա Աֆոյանը:
Կարդացեք նաև
Արդարադատության նախարարություն
