«Քրեական գործում կան այնպիսի նյութեր, որոնք ակնհայտորեն հաստատում են Սուրիկ Խաչատրյանի, նրա որդու և Զարզանդ Նիկողոսյանի մեղքն այդ օրը տեղի ունեցած իրադարձությունների մեջ»,-այսօր «Հայելի» ակումբում լրագրողների հետ հանդիպմանը հայտարարեց Բուդաղյանների փաստաբան Հայկ Ալումյանը:
Նա հիշեցրեց, որ ժամանակին դժգոհում էր, որ չեն տրամադրում քրեական գործի ամբողջ նյութերը՝ պատճառաբանելով, թե «հավանաբար կան այնպիսի տվյալներ, որոնք ցանկալի չեն Սուրիկ Խաչատրյանի և նրա մերձավորների համար, որ դառնան հայտնի հանրությանը»:
Հայկ Ալումյանը նշեց, որ հիմա, երբ արդեն Սյունիքի մարզի ընդհանուր իրավասության դատարանում ընթանում է Արտակ Բուդաղյանի գործով դատաքննությունը, արդեն ներկայացվել են քրեական դատավարության նյութերը, որոնք ուսումնասիրելով պարոն Ալումյանը այսպիսի կարծիք է հայտնում. «Սուրիկ Խաչատրյանի առանձնատան տեսախցիկներից մեկը ուներ առանձնահատկություն, այն ձայն էր գրում, որը հայտնի չէր ընտանիքի անդամներին: Հետագայում, երբ այն հանրահայտ տեսանյութը ուղարկվել էր փորձաքննության, փորձագետներին հաջողվել էր ոչ միայն այդ տեսագրությունը վեր հանել, այլև պարզեցնել խոսակցությունները և վերծանման ձևով ներկայացնել քննության»:
Պարոն Ալումյանը նշեց, որ այդ խոսակցությունների շարքում են այն խոսակցությունները, որոնք տեղի են ունեցել մինչև հրաձգությունը: Այս առիթով պարոն Ալումյանը մանրամասնեց. «Երբ Զարզանդ Նիկողոսյանը գալիս է տուն, նրա հետ քննարկվում է Սուրիկ Խաչատրյանի մեքենայում տեղի ունեցածը, որտեղ բաց տեքստում երևում է, որ Արտակ Բուդաղյանին ծեծել են և պարզ երևում է, որ ծեծողներից մեկը եղել է Սուրիկ Խաչատրյանը:
Կարդացեք նաև
Պարոն Ալումյանն այս համատեքստում նշեց, որ այս նյութերի շուրջ զուտ ձևական երկու-երեք հարցուպատասխան է եղել և ըստ էության դատաքննություն չի իրականացվել:
Ավելին, Վերաքննիչ դատարանը մերժել է իրենց ներկայացրած վերաքննիչ բողոքը կապված դատարանի այն որոշման հետ՝ համաձայն որի Սուրիկ Խաչատրյանի նկատմամբ քրեական հետապնդում չի իրականացվել:
Քրեական գործի նյութ համարվող խոսակցությունների մյուս հատվածը հաստատում է այն, որ Բուդաղյանների կրակոցները եղել են ինքնապաշտպանական մղումներից ելնելով»:
Նշված խոսակցության վերծանությունն ու տեսանյութը՝ շուտով:
Տաթև ՀԱՐՈՒԹՅՈՒՆՅԱՆ
