ԱԺ տնտեսական հարցերի մշտական հանձնաժողովի նիստում պատգամավոր Էդմոն Մարուքյանն առաջարկեց «Շահումով խաղերի եւ խաղատների մասին» օրենքում փոփոխություններ կատարել: Նախագծով նա առաջարկում է, որ 21 տարեկանից ցածրներին խաղատներ ներս թողնելու համար պետք է պատիժ սահմանվի: Եթե նրանց եւ սեւ քարտ ունեցողներին թույլ տան, որ խաղադրույքներ կատարեն՝ պատժվում է 300 հազար դրամով:
Գործող օրենքով արգելված էր 21 տարեկանից ցածրների մուտքը խաղատուն, բայց խոսք չկար այն մասին, որ խաղատան տնօրինությունը պետք է հետեւի դրան, այլապես կպատժվի: Եթե անչափահասը, կամ սահմանափակ անգործունակ ճանաչված անձը մտնում է խաղատուն, խաղադրույք է կատարում, պարտվում է, ամբողջ գործարքը համարվում է անվավեր եւ խաղատան համար պատասխանատվության խնդիր է առաջանում:
Հարցին, թե ինչպես են վերահսկելու, որ անչափահասները մուտք չգործեն խաղատուն՝ Էդմոն Մարուքյանը պատասխանեց, որ կազմակերպիչը, այսինքն` խաղատան տնօրինությունը պարտավոր է ստուգել նրա տարիքը: Նա ասաց, որ, օրինակ, ԱՄՆ-ում մուտքի մոտ ստուգում են փաստաթղթերը: Եթե տարիքը ցածր է, ներս չեն թողնում:
Էդմոն Մարուքյանը նաեւ առաջարկում է, որ այս նախագծով խաղատներից կախվածություն ունեցող անձինք, որոնց պատճառով ընտանիքը տուժում է, եթե անձը մի պահ սթափվում է եւ ասում է՝ ես կախվածություն ունեմ, չեմ ուզում գնալ խաղատուն, կարող է ստորագրել եւ սեւ քարտ ստանալ, որը գործում է 3 տարի: Եթե նույնիսկ կամքի ուժը տեղի տա եւ այդ մարդը նորից ուզենա մտնել խաղատուն, սեւ քարտով նրան այլեւս ոչ մի խաղատուն չեն թողնի մտնի:
ՀՅԴ պատգամավոր Արծվիկ Մինասյանն ասաց, որ ապառիկ խաղերի էլ են գնում. «Նիսյա խաղեր են խաղում, սա լրացուցիչ խնդիրներ են առաջացնում»:
Կարդացեք նաև
Հանձնաժողովի նախագահ Վարդան Այվազյանն ասաց, որ ապառիկ խաղերը չեն կարող հսկել որեւէ կերպ: Նա առաջարկեց ոչ թե 3 տարի ժամանակ տալ սեւ քարտ ունեցողներին, այլ՝ 6 ամիս: Նրա տրամաբանությամբ, եթե անձը կամքի ուժ չունեցավ, 3 տարի հետո էլ կխաղա. «Եթե մարդը ինքնուրույն գալիս է, ասում է՝ ես չեմ ուզում խաղալ, սեւ քարտ տվեք ինձ, պետք է նրան տրվի 6 ամիս ժամանակ»:
Վարդան Այվազյանն ասաց, որ խաղամոլ քաղաքացիների դեմն առնելու համար կարող են ՀՀ քաղաքացիների համար խաղատուն մուտքը գումարով անել: Օրինակ, Սինգապուրն իր երկրի քաղաքացիների համար խաղատներ մուտքի վճար է սահմանել՝ լրացուցիչ 300 դոլար: Իսկ տուրիստների համար անվճար է, այսինքն, խաղատները հիմնականում զբոսաշրջիկների համար են:
Հանձնաժողովը որոշեց օրինագիծը մտցնել քառօրյա նիստերի օրակարգ:
Հռիփսիմե ՋԵԲԵՋՅԱՆ
