Այսօր կառավարության նիստին արդարադատության նախարար Հովհաննես Մանուկյանը ներկայացրել է, թե Հայաստանի օրենքներով ինչպես են պաշտպանված պաշտոնյաները, երբ նրանց վիրավորում են կամ զրպարտում:
Նիստին ներկա ՀՀ գլխավոր դատախազ Գեւորգ Կոստանյանն էլ բացատրեց վարչապետ Հովիկ Աբրահամյանին, թե օրենքը որ դեպքում ինչ է նախատեսում, ու բոլոր դեպքերում հորդորեց պաշտոնյաներին դիմել դատարան: Ըստ գլխավոր դատախազի, Հայաստանում պետք է պրակտիկա ձեւավորվի, որպեսզի պաշտոնատար անձինք չկաշկանդվեն եւ իրենց վիրավորելու դեպքում՝ դիմեն դատարան:
Հիշեցնենք, որ այս խնդիրը ծագել է այն բանից հետո, երբ Ազգային ժողովում բողոքի ակցիայի ժամանակ «Դեմ եմ»-ի անդամները մանրադրամներ էին նետել կառավարության անդամների վրա:
Այսօր կառավարության նիստից հետո լրագրողները հետաքրքրվեցին, թե ՀՀ քաղաքացին ինչպե՞ս է պաշտպանված, երբ նրան պաշտոնյան է վիրավորում, օրինակ` Ազգային անվտանգության ծառայության ղեկավար Գորիկ Հակոբյանը բողոքի ակցիայի մասնակցին հրապարակային «ոչխար է» անվանել, դատախազն ասաց, որ քաղաքացին` պաշտոնյային, պաշտոնյան` քաղաքացուն վիրավորելու դեպքերը քաղաքացիաիրավական հարաբերությամբ, քաղաքացիաիրավական պաշտպանության ենթական իրավիճակներ են, այդ պատճառով էլ ապաքրեականացվեցին: Այսինքն` բոլոր դեպքերում անձը պետք է դիմի դատարան:
Կարդացեք նաև
Պարոն Կոստանյանը խնդիրը ներկայացնելիս նաեւ լրագրողների աշխատանքին էր անդրադարձել, նշելով` լրագրողական հանրությունը պետք է ինքնակազմակերպվի եւ ինքնակառավարվի, այդ թվում՝ էթիկական նորմեր պետք է ներդրվեն, սա աշխարհում ընդունված պրակտիկա է:
Այս առնչությամբ էլ պարոն Կոստանյանը լրագրողների հետ զրույցում ասաց. «Ես ներկայացրեցի, որ միաժամանակ խրախուսվում է լրագրողների` իրենց ինքնակարգավորման մեխանիզմները, իրենք սահմանում են էթիկայի որոշ նորմեր, բոլոր լրագրողները պարտավոր են հետեւել այդ էթիկայի պահանջներին,եւ այդ պահանջների խախտման դեպքում իրենց ներքին կանոնադրության պատասխանատվության եղանակներ են նախատեսում: Հարգելի լրագրողներ, իսկ եթե դուք լինեիք այդ վիրավորված անձի փոխարեն, եւ նույն լրագրողն իր սենսացիայի, կամ անձնական շահագրգռվածությունից ելնելով փորձեր ստորացնել ձեր արժանապատվությունը…»:
Պարոն Կոստանյանն ասաց, որ պետք է դիմել դատարան, որպեսզի նախադեպ ձեւավորվի: Հարցին` ինչու՞ պաշտոնյանները վիրավորանքի դեպքում չեն դիմում դատարան, գուցե նրանք չե՞ն վստահում դատարաններին, գլխավոր դատախազն ասաց. «Դա իրենց իրավունքն է, ես չեմ կարող նման գնահատական տալ, վիրավորանքը հասարակության մեջ ավելի շատ սուբյեկտիվ կարծիք է: Իրավական տեսակետից վիրավորանքը հետեւյալն է՝ այնպիսի արտահայտություն, որը օբյեկտիվ դիտորդի աչքի համար կարող էր նվաստացուցիչ լինել տվյալ անձի համար»:
Նելլի ԲԱԲԱՅԱՆ
