Սյունիքի մարզի ընդհանուր իրավասության դատարանում շարունակվում է Արտակ Բուդաղյանի գործով դատաքննությունը:
Հիշեցնենք, որ Արտակ Բուդաղյանին մեղադրանք է առաջադրվել այն բանի համար, որ նա իր եղբայր Ավետիք Բուդաղյանից տեղեկանալով, որ 01.06.2013թ. ժամը 22-ի սահմաններում Սյունիքի նախկին մարզպետ Սուրիկ Խաչատրյանի ավտոմեքենայում իրեն ծեծի են ենթարկել, նպատակ ունենալով վախեցնել Սուրիկ Խաչատրյանին և նրա ընտանիքի անդամներին, նրանց մոտ առաջացնել տագնապի, սեփական անվտանգության համար անհանգստության զգացում, նույն օրը ժամը 23-ի սահմաններում ՎԱԶ 2106 մակնիշի 30 SU 994 պետհամարանիշի ավտոմեքենայով գնացել է Գորիս քաղաքի Դավիթ-Բեկ փողոցում գտնվող` Սուրիկ Խաչատրյանին պատկանող առանձնատան մոտ: Իր հետ նախապես վերցված,իր անվամբ գրանցված որսորդական հրացանը ձեռքին իջնելով ավտոմեքենայից սպանության սպառնալիքներ է տվել Սուրեն Խաչատրյանի և նրա հարազատների հասցեին:
Արտակ Բուդաղյանը դատարանում նշեց, որ իրեն մեղավոր չի համարում:
Կարդացեք նաև
«Տուժող կողմը կարողանում է այնպիսի իրավիճակ ստեղծել, որ այսօր հարցաքննվի հենց այն մեկը բազմաթիվ վկաներից, որն իրենց պետք է, որ էսօր հարցաքննվի: Առանցքային վկա Զարզանդ Նիկողոսյանը, եթե հարցաքննվի, նրա հակասությունների, ակնհայտ անհամապատասխանությունների վերաբերյալ, երբ որ հարցաքննվի Լորետա Բարսեղյանը արդեն իմանալու է ինչի մասին է խոսքը», – նշեց Արտակ Բուդաղյան փաստաբան Հայկ Ալումյանը:
Այսօրվա նիստին տուժող կողմ հանդիսացող Լորետա Բարսեղյանը՝ Սուրիկ Խաչատրյանի կինը, չէր ներկայացել, իսկ վկաներն էլ այդպես էլ չհարցաքննվեցին, քանի որ դատարանում որոշվեց ապացույցների հետազոտությունը սկսել դեպքի տեսաձայնագրության հետազոտությունից, ինչն էլ այս պահին շարունակվում է դատարանում:
«Լորետա Բարսեղյանը շատ կցանկանար հետ վերցնել այս բողոքը, եւ այդ դեպքում մեր խորին համոզմամբ, այս գործով պետք է կայացվեր որոշումը՝ դադարեցնելու, կարճելու քրեական գործը, բայց մենք այդ միջնորդությունը չենք անում, որպեսզի չլինի քննարկում, չշահարկվի, որ մենք ինչ-որ բանից խուսափելով որոշեցինք, որպեսզի դատական քննությունը չկայանա>, – ասաց տուժող Լորետա Բարսեղյանի ներկայացուցիչ Ռուբեն Սահակյանը:
Մանրամասները՝ տեսանյութում
Մերի ՍՈՂՈՄՈՆՅԱՆ
