«Մեդիա կենտրոն». «Հոկտեմբերի 10-ին Հայաստանի՝ Եվրասիական տնտեսական միությանն անդամակցության պայմանագիրը չի ստորագրվի. Հոկտեմբերի 10-ին անդամակցություն տեղի չի ունենա»: «Մեդիա կենտրոն»-ում «Մաքսային միությանն անդամակցելու վերաբերյալ որոշումից մեկ տարի անց. մարտահրավերներ, հեռանկարներ» թեմայով բանավեճի ժամանակ նման կարծիք հայտնեց քաղաքագետ-վերլուծաբան, Միջազգային և անվտանգության հարցերի հայկական ինստիտուտ հասարակական կազմակերպության ղեկավար Ստյոպա Սաֆարյանը: Անդամակցությունն անշուշտ կլինի, բայց մեզ համար շատ ավելի կարևոր է Ռուսաստանի հետ ռազմաքաղաքական, տնտեսական, մշակութային հարաբերությունները, համոզված է քաղաքագետ Լևոն Շիրինյանը: «Մեդիա կենտրոն»-ի նախաձեռնությամբ, «Ա1+» հեռուստաընկերության առցանց ուղիղ հեռարձակմամբ անցկացված «Մաքսային միությանն անդամակցելու վերաբերյալ որոշումից մեկ տարի անց.մարտահրավերներ, հեռանկարներ» թեմայով բանավեճի մասնակիցների տեսակետները շարունակում մնալ հակասական Մաքսային միությանն անդամակցելու վերաբերյալ կայացրած որոշումից մեկ տարի անց:
Բանավեճի ամբողջական տեսաձայնագրությունը դիտեք այստեղ:
Բանավեճին մասնակցում էին
Անուշ Սեդրակյանը -քաղաքական մեկնաբան
Կարդացեք նաև
Ստյոպա Սաֆարյանը – քաղաքագետ, վերլուծաբան Միջազգային և անվտանգության հարցերի հայկական ինստիտուտ հասարակական կազմակերպության ղեկավար
Արթուր Ղազինյանը – ԵՊՀ եվրոպական ուսումնասիրությունների կենտրոնի տնօրեն
Վարդան Խաչատրյանը – ԱԺ 4-րդ գումարման պատգամավոր, քաղաքագետ
Երվանդ Բոզոյանը – քաղաքագետ
Լևոն Շիրինյանը – քաղաքագետ
Ստյոպա Սաֆարյանը համոզված պնդում է, որ որ Հայաստանը Եվրասիական միությանը միանալու որոշումը կայացրել է ճնշումների, շանտաժների արդյունքում: Եվ չնայած հայտարարվում է, որ ՀՀ-ն միանում է այդ միությանն անվտանգության երաշխիքներից ելնելով, այդուհանդերձ 2013 թ. սեպտեմբերի 3-ից հետո, ըստ վերլուծաբանի, անվտանգության ռիսկներն ավելացել են:
Քաղաքագետ Վարդան Խաչատրյանի խոսքով, մի տարածաշրջանում, որտեղ վտանգը գնալով ահագնանում է, ունի իր հրամայականը՝ անվտանգության համակարգի փոփոխություն հնարավոր չէ: Քաղաքագետը նշեց նաև, որ անդամակցելով Մաքսային միությանը, պետք է հիշել, որ «քաղաքակիրթ աշխարհի հետ երկխոսությունը շարունակվում է, կամ-կամ-ի հանգամանքը պետք է ժամանակի ընթացքում դուրս գա»:
Քաղաքական մեկնաբան Անուշ Սեդրակյանի կարծիքով ՄՄ-ին անդամակցելու վերաբերյալ որոշումը Հայաստանին տվեց կարճատև դադար, բայց այդ որոշակի դադարն աշխատում է ի վնաս Հայաստանի, այս ժամանակահատվածն աշխատում է նաև ի վնաս այն տնտեսական համակարգի, որին մենք պատրաստվում ենք ինտեգրվել: «Ռուսաստանը իզոլացվում է քաղաքական աշխարհից, թե տնտեսապես, թե քաղաքականապես»: Ինչ վերաբերում է ԵՏՄ-ին անդամակցությանն, ապա քաղաքական մեկնաբանը հնարավոր համարում է, որ Հայաստանը ֆորմալ ստորագրի ԵՏՄ-ին անդամակցության պայմանագիրը, բայց միայն այդքանը, ժողովրադական խոսքով ասած «անունը կլինի, ամանում ոչ», Հայաստանը դրանից հետո կսպասի ռուսական բևեռի փլուզմանը:
ԵՊՀ եվրոպական ուսումնասիրությունների կենտրոնի տնօրեն Արթուր Ղազինյանն ասաց, որ Հայաստանի՝ Եվրասիական միության միանալու որոշումը սխալ էր, քանի որ Հայաստանում չկար տնտեսական որևէ հենք անդամակցելու այդ տնտեսական կառույցին:
Ըստ նրա, և Հայաստանը, և ՌԴ-ն նախորդ տարի սեպտեմբերի 3-ին արված ՀՀ հայտարարությունից՝ ԵՏՄ-ին անդամակցելու մասին, իրենց սպասելիքներն ունեին. ՌԴ-ի սպասելիքները՝ Հայաստանը չի ստորագրի Ասոցացման համաձայնագիրը, կընկնի ՀՀ-ի վարկանիշը, Հայաստանի՝ էժան գազ կունենա և ղարաբաղյան հարցում ՌԴ-ն չեզոքություն կպահպանի. «Մենք ստացանք մերը, իրենք՝ իրենցը» , ամփոփեց միտքը Արթուր Ղազինյանը:
Քաղաքագետ Լևոն Շիրինյանն էլ այն կարծիքին է, որ անդամակցությունը ինչպես ՄՄ-ին, այնպես էլ ԵՏՄ-ին անշուշտ կլինի, բայց, ըստ նրա, Հայաստանի համար շատ կարևոր է Ռուսաստանի հետ ռազմաքաղաքական, տնտեսական , մշակութային հարաբերությունների ամրապնդումը: Լևոն Շիրինյանը համոզված է, որ ռուսական բևեռը կայանում է:
Երվանդ Բոզոյանի մեկնաբանությամբ, երբ Հայաստանը հավասարակշռված քաղաքականություն էր իրականացնում «մեր սահմաններին կրակոցներ չկային, փայլուն հավասարակշռված հարաբերություններ ունեինք Ռուսաստանի հետ, Արևմուտքի հետ և ոչ մի խնդիր չկար: Հիմա գնում է պայքար Ռուսաստանի և Արևմուտքի միջև Ադրբեջանի համար, մենք դառնում ենք ֆուտբոլի գնդակ մեր իսկ խելքի պատճառով»:
