Ֆրանսիացի պատգամավոր Վալերի Բուայեն Հայոց ցեղասպանության ժխտման մասին նոր օրինագիծ է ներկայացրել խորհրդարան, այդ մասին նա գրել է իր պաշտոնական կայքում:
«Այս օրերին, երբ մենք պատրաստվում ենք նշել Հայոց ցեղասպանության 100-րդ տարելիցը, Ֆրանսիայում ոչ մի օրենք չկա, որը կդատապարտի Հայոց ցեղասպանության ժխտումը և մարդկության դեմ հանցագործությունները, ինչպես Հոլոքոստի դեպքում», – գրել է Բուայեն սեպտեմբերի 2-ին, – «Մինչ օրս Ֆրանսիան երկու ցեղասպանություն է պաշտոնապես ճանաչել՝ հայերինն ու հրեաներինը, սակայն միայն Հոլոքոստի ժխտումն է օրենքով պատժվում:
Պատգամավորն այս օրինագծի ընդունումը կարևորել է նաև՝ հիշատակելով Իրաքում քրիստոնյաների, եզդիների նկատմամբ տեղի ունեցող սպանդը՝ նշելով, որ ՄԱԿ-ի գլխավոր քարտուղար Բան Կի Մունն այդ դեպքերը որակել է որպես մարդկության դեմ հանցագործություն:
2011թ. Վալերի Բուայեի ցեղասպանությունների ժխտման դեմ օրենքի նախագիծն ընդունել էր խորհրդարանը և սենատը, սակայն սահմանադրական դատարանը չէր ընդունել՝ համարելով, որ ժխտումը ազատ խոսքի իրավունք է:
Կարդացեք նաև
Բուայեն նշել է, որ օրինագծի տեքստը շուտով կհայտնվի Ֆրանսիայի խորհրդարանի կայքում:
Պատրաստեց Հովհաննես ԻՇԽԱՆՅԱՆԸ
