Սյունիքի մարզի ընդհանուր իրավասության դատարանում այս պահին ընթանում է Արտակ Բուդաղյանի գործով դատաքննությունը:
Նիստին չի ներկայացել տուժող կողմ հանդիսացող Սյունիքի նախկին մարզպետ Սուրիկ Խաչատրյանի կինը՝ Լորետա Բարսեղյանը՝ առողջական խնդիրների պատճառով:
Դատարանը որոշեց ապացույցների հետազոտությունը սկսել տեսաձայնագրության հետազոտումից, որից հետո կհարցաքննվեն վկաները: Այսօր վկայություն տալու համար դատարան է ներկայացել Զարզանդ Նիկողոսյանը, որը եղել է դեպքի վայրում:
Հիշեցնենք, որ ըստ մեղադրական եզրակացության՝ Արտակ Բուդաղյանին մեղադրանք է առաջադրվել այն բանի համար, որ նա իր եղբայր Ավետիք Բուդաղյանից տեղեկանալով, որ 01.06.2013 թ ժամը 22-ի սահմաններում Սյունիքի նախկին մարզպետ Սուրիկ Խաչատրյանի ավտոմեքենայում իրեն ծեծի են ենթարկել, նպատակ ունենալով վախեցնել Սուրիկ Խաչատրյանին և նրա ընտանիքի անդամներին,նրանց մոտ առաջացնել տագնապի, սեփական անվտանգության համար անհանգստության զգացում, նույն օրը ժամը 23-ի սահմաններում ՎԱԶ 2106 մակնիշի 30 SU 994 պետհամարանիշի ավտոմեքենայով գնացել է Գորիս քաղաքի Դավիթ-Բեկ փողոցում գտնվող`Սուրիկ Խաչատրյանին պատկանող առանձնատան մոտ, իր հետ նախապես վերցված,իր անվամբ գրանցված որսորդական հրացանը ձեռքին իջնելով ավտոմեքենայից ,սպանության սպառնալիքներ է տվել Սուրեն Խաչատրյանի և նրա հարազատների հասցեին:
Արտակ Բուդաղյանի նկատմամբ խափանման միջոց է ընտրված ստորագրություն չհեռանալու մասին:
Մերի ՍՈՂՈՄՈՆՅԱՆ
