«Սփյուռքը կարծես թե երեսով թեքվել է դեպի աղետի գոտի: Ցավոք նույնը ՀՀ իշխանությունների մասին չեմ կարող ասել»,-այսօր «Ելակետ» ակումբում լրագրողների հետ հանդիպմանը հայտարարեց «Շիրակ կենտրոնի» նախագահ Վահան Թումասյանը:
Սեպտեմբերի 7-ին «Շանթ» հեռուստաընկերության 20-ամյակի կապակցությամբ ԱՄՆ-ում հեռուստամարաթոն է կազմակերպվելու և հավաքված գումարով բնակարաններով են ապահովվելու Գյումրիի անօթևան ընտանիքները: Վահան Թումասյանը նշեց, որ դեռ մարաթոնը չսկսած՝ արդեն 200.000 դոլար հավաքվել է: Նա տեղեկացրեց, որ նման հեռուստամարաթոններ են նախատեսվում կազմակերպել նաև Գերմանիայում և Կանադայում:
Պարոն Թումասյանը կարևորեց իրավիճակի լուսաբանման հարցը ու նշեց. «Մենք պարբերաբար հանրայնացնում ենք իրավիճակը, որ կա աղետի գոտում: Արդեն 400 տեսանյութ ենք պատրաստել տարբեր ընտանիքների մասին, որոնք լայն արձագանք են գտել ոչ միայն Հայաստանում, այլև արտասահմանում: Միայն Հայաստանի և պետական միջոցների հաշվին անհնար է ամբողջովին վերականգնել աղետի գոտին: Եթե նախկինում ընդունված չէր խոսել այդ մասին, հիմա փաստորեն հրապարակային գործունեության արդյունքներն են, որ անօթևան ընտանիքների բնակարանների ապահովման հարցում օգտակար է լինում նաև Սփյուռքը»:
Անդրադառնալով Գյումրիում անօթևանների իրավիճակին՝ պարոն Թումասյանն ասաց. «Գյումրիում երեք կարգի անօթևան ընտանիքներ կան. 432 ընտանիք, որոնք ճանաչվել են անօթևան և հերթագրված են հերթացուցակում և պետությունը պետք է բնակարանով ապահովվի, 700 ընտանիքների վերաբերյալ դեռ որոշում չկա, սակայն հերթացուցակներում հերթագրված են և 3000 ընտանիք, որոնք անօթևան չեն համարվում, բայց ապրում են ծայրահեղ վատ բնակարանային պայմաններում»: Վահան Թումասյանը դժգոհություն հայտնեց Բնակարաններ գնման վկայականների տրամադրման ծրագրից՝ նշելով, որ բազմաթիվ մարդիկ դարձել են այդ ծրագրի զոհեր. «Մոտ երկու տարի է շինարարությունը Գյումրիում դադարեցված էր, այս տարի որոշեցին այլ ձևով խնդիրը լուծել. անօթևաններին սերտիֆիկատներ են ուղարկում, անօթևանները բնակարանը գնում են, հետո պետության կողմից գումարը հատկացվում է:
Կարդացեք նաև
Բայց այդ գումարով մարդիկ բնակարան չէին կարողանում գնել, քանի որ բնակարանների գները բարձրացվում էին: Մենք առաջարկել ենք, որ լավագույն տարբերակը կլինի այն, որ բնակարանները գնի պետությունը և վիճակահանությամբ բաշխի շահառուին, ոչ թե սերտիֆիկատ տրամադրի շահառուներին: Սկզբում այդ առաջարկությունն ընդունվեց, հետո առանց պատճառաբանության մերժվեց»:
Տաթև ՀԱՐՈՒԹՅՈՒՆՅԱՆ
Ցավալի է, բայց պետք է նշել, որ աղետից անցել են շատ ու շատ տարիներ: Մեր ղեկավարները անդադար խոսում են ժողովրդավարությունից, պրոգրեսից ու արդարությունից, մինչդեռ այս պայմաններում դեռ վաղուց պետք է լուծված լինեին աղետի գոտում բոլոր խնդիրները:
Նայում ես Եվրոպական երկրներ` ջրհեղեղ, տայֆուն, երկրաշարժ ու այլ տարերային աղետներ, բայց արի ու տես, որ կոմպետենտ ղեկավարները կարողանում են բավականին կարճ ժամանակահատվածում արձագանքել ու լուծում գտնել ծագած հարցերը:
Էլի բողոքողի դերում հայտնվեցի, բայց արի ու մի հիասթափվի էս ամենից (երկրի ղեկավարի Սարգսյանի գլախավորությամբ), որ ժողովրին ուղղակի ու անուղղակի բոլոր ձևերով ստիպում են մուրալ: Ժողովուրդս մուրացկան է դարձել, տխրում եմ:
Պատասխանատուներ… պատասխան եք տալու !!!!!!!!!!