Այսօր կառավարության շենքի մոտ նորից բողոքի ակցիա են անում «Նաիրիտ» գործարանի աշխատակիցները: Չնայած նաիրիտցիները պահանջում էին, որ վարչապետ Հովիկ Աբրահամյանն անձամբ հանդիպի իրենց, բայց ցուցարարների հետ հանդիպեց էներգետիկայի եւ բնական պաշարների նախարար Երվանդ Զախարյանը:
Նաիրտցիներին նախարարը խոստացավ առաջիկայում՝ մինչեւ սեպտեմբերի 15-ը, վճարել մեկ ամսվա աշխատավարձի պարտքը:
Նաիրիտցիները պահանջում են ոչ միայն աշխատավարձի հարցը լուծել, այլ վերագործարկել ամբողջ գործարանը, ինչին ի պատասխան Երվանդ Զախարյանը վստահեցրեց, որ այդ ուղղությամբ ուսումնասիրություններ են կատարվում: Ընդ որում, նախարարը նշեց, որ «Ռոսնեֆտ» ընկերության հետ հույսեր պետք չէ կապել:
«Նաիրիտի» արհմիության նախագահ Հրաչ Թադեւոսյանը նախարարի հետ պայմանավորվածությունը փոխանցեց բողոքի ակցիայի մասնակիցներին, ինչից ակցիայի մասնակիցները առանձնապես չոգեւորվեցին ու հեռացան կառավարության շենքի մոտից:
Մեզ հետ զրույցում մի խումբ նաիրիտցիներ ասացին, որ մեծ հույսեր չեն կապում Զախարյանի եւ ընդհանրապես՝ կառավարության հետ:
Կարդացեք նաև
Այս մասին մանրամասները՝ առաջիկայում:
Նելլի ԲԱԲԱՅԱՆ
