«Կարծիք հայության» ժողովրդավարության աջակցության հասարակական կազմակերպության նախագահ Սամվել Քոչարյանն «Առավոտ»-ին ուղղված նամակում իր կազմակերպության 400 անդամների հետ միասին առաջարկում է Լեռնային Ղարաբաղի հարցի խաղաղ կարգավորման ավարտի վերաբերյալ հետեւյալ լուծումը. «Հայտնի է, որ Լեռնային Ղարաբաղի հակամարտության խաղաղ կարգավորման հարցով 20 տարի է՝ զբաղվում է Մինսկի խումբը, որի գլխավոր արդյունքը եղել է խաղաղության պահպանումը: Իսկ բուն խնդրի լուծումը, այն է՝ հաշտեցնել եւ խաղաղության պայմանագրով ավարտել հակամարտությունը, տեղի չի ունեցել, եւ վերջը չի էլ երեւում:
Քանի որ Ադրբեջանն ընդհանրապես պատմության ընթացքում ագրեսիվ վերաբերմունք է դրսեւորել եւ Հայաստանի հանդեպ երբեք չի ցուցաբերել հարեւանության նշույլներ, խաբել է այս ու այլ միջնորդների՝ ինչպես ներկայումս, իրականում ԼՂՀ-ի մի մասը եւ Նախիջեւանը գտնվում են Ադրբեջանի հսկողության տակ, ուստի Հայաստանը, մեծ հաշվով, ոչ մի քառակուսի մետր հող չունի տալու: Սակայն հաշվի առնելով, որ հետագայում Ադրբեջանը մեզ համար դառնալու է հնարավոր հարեւան, եւ երկու ժողովուրդները վերջապես իսկական հարեւանություն են անելու, ապա այդ դեպքում Հայաստանը կարող է զիջել միայն մեկ շրջան Աղդամի կողմից կամ Արեւելքից»:
Սամվել Քոչարյանի կարծիքով՝ Հայաստանը պետք է զիջի նաեւ բազմամյա շրջափակումը, իսկ Իրան-Հայաստան գազատարից եւ Հայաստանի էլեկտրական ցանցերից Ադրբեջանի օգտվելու հարցը կարող է քննարկվել տեսանելի ապագայում. «Ադրբեջանն ու Թուրքիան կարող են առեւտուր անել Հայաստանի վրայով եւ մասնակցությամբ: Իսկ այն միջոցները, որոնք օգտագործվում են ադրբեջանական եւ հայկական բանակների սպառազինության համար, կարող են օգտագործվել հանուն երկու ժողովուրդների բարօրության, ինչը կնպաստի, որպեսզի դադարի կամ խիստ նվազի երկու ժողովուրդների արտագաղթը»:
Սեփ.լր.
Կարդացեք նաև
«Առավոտ» օրաթերթ
03.09.2014
