Տավուշի մարզի առաջին ատյանի դատարանի դատավոր Ռաֆիկ Մելքոնյանը օգոստոսի 15-ին վճռել է Իջեւան քաղաքի բնակիչ, 1981թ. ծնված Գագիկ Սարգսյանին մեղավոր ճանաչել ՀՀ քրեական օրենսգրքի 177 հոդվածի 3-րդ մասի 1-ին կետով («Գողությունը, որը կատարվել է առանձնապես խոշոր չափերով») եւ նրան դատապարտել 6 տարվա ազատազրկման:
Դատարանն ապացուցված է համարել,որ Գ. Սարգսյանը 2012թ. դեկտեմբերի 24-ի լույս 25-ի գիշերը նախնական համաձայնության գալով Երեւան քաղաքի բնակիչ, իր հորաքրոջ տղա Մհեր Խլղաթյանի հետ, տեխնիկական միջոցների գործադրմամբ մուտք է գործել Իջեւանի շուկայի հարակից տարածքում գտնվող, Իջեւան քաղաքի ավագանու անդամ Արտակ Խաչատրյանին պատկանող ոսկյա իրերի խանութ-սրահ եւ այնտեղից գողացել 66 միլիոն դրամի ոսկյա զարդեր:
Մեր տեղեկություններով՝ Մհեր Խլղաթյանը Մոսկվայում կալանավորված է տեղի ոսկու խանութներից մեկից առավել խոշոր չափերով գողության համար:
Գագիկ Սարգսյանը հրաժարվել է դատարանում ցուցմունք տալ: Դատարանում հրապարակվել են նրա նախաքննական ցուցմունքները: Դատարանը վճռել է քաղաքացիական հայցը բավարարել եւ հօգուտ տուժող Արտակ Խաչատրյանի բռնագանձել 66 միլիոն դրամ՝ որպես հանցագործությամբ պատճառված վնասի հատուցում:Դատարանի վճռով արգելանք է դրվել Գ. Սարգսյանին պատկանող շարժական եւ անշարժ գույքի վրա:
Սույն վճիռը կարող է բողոքարկվել մեկամսյա ժամկետում:
Կարդացեք նաև
Ոսկան ՍԱՐԳՍՅԱՆ
