Մաքսային միության դեմ բողոքող մի խումբ քաղաքացիներ այսօր Բաղրամյան 26` նախագահական նստավայրին մոտեցան «Սերժիկ, տամոժնիկ» վանկարկելով:
Հետո ոստիկաններից հետաքրքրվեցին, թե որտեղ է «կոմսոմոլի քարտուղարը, տամոժնիկը»: Ոստիկաններից մեկի դիտարկմանը, թե սադրիչ հարցեր մի տվեք, Գյումրու ժուռնալիստների «Ասպարեզ» ակումբի նախագահ Լեւոն Բարսեղյանն ասաց` ով որ սադրվում է, թող չլսի:
Նստավայրի դիմաց ավագանու անդամ Դավիթ Սանասարյանը կարդաց իրենց հայտարարությունը:
Կարդացեք նաև
«Մաքսային միությունն այն շղարշն է, որի տակ ռուսական դիվանագիտությունը կլուծի իր համար շահավետ խնդիրներ: Տարիներ շարունակ Ռուսաստանը Հայաստանի հետ հարաբերություններում ցույց է տվել, որ հեռու է ռազմավարական դաշնակից կոչվող հասկացողությունից, նրա քայլերն ուղղված են Հայաստանի թուլացմանը: Ռազմական բազայի տեղակայմամբ և անվտանգության երաշխավորի քողի տակ՝ Ռուսաստանը տարիների ընթացքում խլեց Հայաստանի սեփականությունը, ռուսականացրեց ինքնուրույնության ու ինքնիշխանության երաշխիք հանդիսացող անվտանգության և պետական կարևորագույն օբյեկտները, և հիմա արդեն տարբեր մակարդակներով փորձ է անում վնասել մայրենի լեզուն՝ Հայաստանում ռուսերենը հայերենին հավասար կարգավիճակ տալու նախաձեռնություններով…Հայաստանին առաջարկվում է գնալ դեպի մի կառույց, որն ունի ծայրահեղ խայտառակ հիմքեր, որը ոչ միայն Հայաստանին որևէ հեռանկար չի խոստանում, այլև ավելի է խորացնում Ռուսաստանի հետ վասալային հարաբերությունները: Այս անդամակցությունից տնտեսական օգուտներ չկան, և ակնհայտ օգուտ ստացողը կլինի միայն օլիգարխական համակարգը:
Հետեւաբար, կոչ ենք անում բոլորին սեպտեմբերի 9-ին դուրս գալ և փաստել աշխարհին, որ մենք դեմ ենք Մաքսային ու Եվրասիական տնտեսական միություններին Հայաստանի միանալու խայտառակ որոշմանը, և ամեն ինչ անելու ենք, որպեսզի դուրս բերենք Հայաստանը դեպի անդունդ գլորող այդ կործանարար ճանապարհից»,- հայտարարեց Դավիթ Սանասարյանը:
Հայտարարությունից հետո էլ ցուցարարները հեռացան նախագահական նստավայրից:
Արփինե ՍԻՄՈՆՅԱՆ
