«Արդեն 23 տարի ես լսում եմ ընդդիմադիրներից, որ թեժ աշուն է լինելու։ Ամեն դեպքում ես նման բան չեմ կանխատեսում»,- ԱԺ պատգամավոր, նախկին ԱԳ նախարար Ալեքսանդր Արզումանյանը ընդդիմադիրների`թեժ աշնան մասին հայտարարություններին հեգնանքով է մոտենում: Սակայն կարծում է, որ կան հարցեր, որոնք առաջիկա ամիսներին կքննարկվեն. մասնավորապես կուտակայինի հարցը, որը կիսատ է մնացել։
Ըստ Ալեքսանդր Արզումանյանի` առանցքային հարց է Հայաստանի՝ Եվրասիական տնտեսական միությանը չմիանալը: Ըստ պարոն Արզումանյանի. «ԵՏՄ-ում ռուլիտ է անում օլիգարխը»:
Ալեքսանդր Արզումանյանը չցանկացավ փակագծեր բացել երեկ ԱԺ-ում ՀՀ արտգործնախարար Էդվարդ Նալբանդյանի և ԱԺ պատգամավորների միջև կայացած դռնփակ հանդիպումից, ավելին, վիրավորվեց այդ հարցից ու նշեց. «Ոչ մի գաղտնիք էլ չի եղել, ուղղակի ջենթլմենական պայմանավորվածություն է եղել, որ հանդիպումը փակ է լինելու, և քննարկումների մասին չեն խոսելու»:
Հարցին նորմա՞լ է, որ ՀՀ ԱԳՆ-ն փակ է գործում, պարոն Արզումանյանը պատասխանեց. «Արտգործնախարարությունը չի կարող գործել բաց դաշտում, դա դիվանագիտական նորմ է: Այլ հարց է, որ նախարարությունը թափանցիկ չի գործում»: Այնուհետև պարոն Արզումանյանը հիշեցրեց, թե կան երկրներ, որտեղ արտաքին քաղաքական դիվանագիտական որոշումների վրա 30-40 տարով գաղտնիության կնիք է դրվում: Հետո եզրափակեց. «Բայց եթե բանակցություններ են վարվում, չենք կարող հարցնել, թե ինչ են խոսել ու պայմանավորվել: Դիվանագետները դրա համար են աշխատավարձ ստանում, որ հասարակությանը ոչինչ չասեն»:
Կարդացեք նաև
Տաթև ՀԱՐՈՒԹՅՈՒՆՅԱՆ
