Օգոստոսի 21-30-ը իջեւանցի 15-21 տարեկան թվով 11 տղաներ եւ աղջիկներ, Իջեւանի քաղաքապետի տեղակալ Սուրեն Մանուկյանը, քաղաքապետարանի աշխատակազմի մշակույթի գծով առաջատար մասնագետ Լիլիթ Ղալումյանը հյուրընկալվել են Իջեւանի եղբայր Վալանս քաղաքում: Իջեւանցի պատանիները բնակվել են ֆրանսահայ իրենց հասակակիցների տներում: Այցելությունը կատարվել է «Բարեւ, Վալանս» ծրագրի շրջանակներում, որը ֆինանսավորվել է Եվրամիության համայնքային ծրագրի կողմից:
Այդ ծրագրի ներկայացուցիչներ Էլիզաբեթ Ալաշյանը եւ Թամար Ստեփանյանը պատվիրակության կազմում էին: Իջեւանի քաղաքապետի տեղակալ Սուրեն Մանուկյանն ասաց, որ այցելությունը շատ հագեցած էր, իջեւանցիները եղել են Վալանսի հայկական եկեղեցում, տեղի հայ մշակույթի կենտրոնում, հայոց ցեղասպանությանը նվիրված թանգարանում, նաեւ՝ այցելել Փարիզ, Լիոն, Ռոմա: Իջեւանի փոխքաղաքապետը Վալանսի քաղաքապետ պ-ն Դարոգոնին հրավիրել է հաջորդ տարի այցելել Իջեւան:
Ոսկան ՍԱՐԳՍՅԱՆ
