Ինչպես արդեն տեղեկացրել ենք, ՀՀ սպորտի և երիտասարդության հարցերի նախարար Գաբրիել Ղազարյանն այսօր այցելեց Երևանի օլիմպիական հերթափոխի պետական մարզական քոլեջ:
Նշենք, որ քոլեջում հանրակրթական և մարզական բաղադրիչով կրթություն են ստանում Արցախից, Ջավախքից, ՀՀ մարզերից շուրջ 600 երեխաներ: Սակայն քոլեջն այսօր ունի շենքային պայմանների բարելավման առումով որոշ խնդիրներ:
Aravot.am-ի հետ զրույցում քոլեջի տնօրեն Արմեն Գաբրիելյանը, թեև իր գոհունակությունը հայտնեց ՀՀ կառավարությունից և Հայաստանի ազգային օլիմպիական կոմիտեից, բայց նաև նշեց, որ քոլեջի ուսումնական մասնաշենքը 1971-ից ի վեր չի վերանորոգվել: Նրա փոխանցմամբ` բազմիցս դիմել են, որ ընդգրկվեն կառավարության այս կամ այն ծրագրում, սակայն ինչ-ինչ հանգամանքներից ելնելով ծրագրերից դուրս են մնացել` համաշխարհային ճգնաժամի պատճառով: Հետաքրքրվեցինք` այդ դեպքում ինչո՞ւ է գոհ ՀՀ կառավարությունից: Նա պատասխանեց. «Անցյալ տարի փլուզվեց քոլեջի ննջարանային մասնաշենքը. մինչ այդ անընդհատ ձգձգվում էին վերանորոգման աշխատանքները, սակայն այժմ կառավարությունն արդեն ֆինանսական հատկացումներ է նախատեսում անել, նախագծումներ են իրականացվում, որպեսզի քոլեջի շենքի այդ հատվածը վերանորոգվի»:
Հետաքրքրվեցինք` ուրիշ ի՞նչ խնդիրներ ունեն` աշխատավարձերը, գույքային հագեցվածությունը: Արմեն Գաբրիելյանը նշեց, որ իրենց քոլեջում աշխատավարձը մրցունակ է, մարզագույքի հետ կապված խնդիրներ չկան, վերանորոգվել է թեքվանդոյի դահլիճը, կառուցվում են թենիսի կորտեր:
Կարդացեք նաև
Տաթև ՀԱՐՈՒԹՅՈՒՆՅԱՆ
