Արցախից, Ջավախքից, ՀՀ մարզերից շուրջ 600 սան ունեցող Երևանի օլիմպիական հերթափոխի պետական մարզական քոլեջում այսօր տեղի ունեցավ առաջին զանգի արարողություն: Գիտելիքի օրվա կապակցությամբ քոլեջ էր հյուրընկալվել ՀՀ սպորտի և երիտասարդության հարցերի նախարար Գաբրիել Ղազարյանը:
Նախարարը մասնակցեց առաջին զանգի արարողությանը, այնուհետև շրջայց կատարեց քոլեջում: Հանդիպման ավարտին նախարարն իր մաղթանքը գրառեց քոլեջի թանգարանի մատյանում:
Լրագրողների հետ զրույցում Գաբրիել Ղազարյանն անդրադարձավ նաև իր ղեկավարած ոլորտում գոյություն ունեցող խնդիրներին: Նա, մասնավորապես նշեց. «Կադրերի հետ կապված խնդիրներ գրեթե չունենք. մեր թե մանկավարժները, թե մարզիչներն ունեն բարձրակարգ մասնագիտական գիտելիքներ ու փորձ: Խնդիրներ կան մարզադահլիճների և մարզագույքի հագեցվածության հետ կապված: Այդ ուղղությամբ քայլեր ձեռնարկվում են»:
Aravot.am-ի հարցին` ինչպիսի՞ համագործակցության մեջ են ԿԳ նախարարության հետ, քանի որ դպրոցներում ֆիզկուլտուրա առարկային մի տեսակ մատների արանքով են նայում, նախարարը պատասխանեց. «Համագործակցությունը բարիդրացիական է: Այդ ուղղությամբ էլ քայլեր արվում են. ստեղծվել է հանձնաժողով, որը զբաղվելու է կոնկրետ այդ ուղղություններով, որպեսզի կրթական համակարգում ֆիզկուլտուրայի ժամերի դասավանդման գործընթացը բարելավվի»:
Կարդացեք նաև
Մեր դիտարկմանը, ժամանակին առողջ ապրելակերպի քարոզարշավը լուրջ թափ էր հավաքել, հիմա մի տեսակ գործընթացի մարում է նկատվում, պարոն Ղազարյանն արձագանքեց. «Միգուցե, դրա համար էլ մենք ամեն ինչ անում եք, որ ավելի պատշաճ մակարդակով կազմակերպենք այդ գործընթացը»:
Բազմիցս մտահոգություններ են հնչում այն մասին, որ օլիմպիական չեմպիոններին մեր երկրում բնակարաններով ու մեքենաներով են պարգևատրում, ինչը չես ասի գիտության և կրթության ոլորտում օլիմպիական բարձունքներ նվաճած երիտասարդների մասին: Այս առիթով նախարարը նշեց. «Երկու դեպքում էլ նրանք ներկայացնում են մեր երկիրը: Երևի թե կգա մի ժամանակ, երբ կլինի մեկը, ով նման աշխատանք կտանի նաև այդ ոլորտում»:
Տաթև ՀԱՐՈՒԹՅՈՒՆՅԱՆ
