Ծանրամարտի Հայաստանի պատանեկան հավաքականի ավագ մարզիչ Վիգեն Խաչատրյանն այսօր «Պոստ Սկրիպտում» մամուլի ակումբում, խոսելով Նանկինում անցկացված պատանեկան խաղերում հայաստանցիներ Հակոբ Մկրտչյանի եւ Սիմոն Մարտիրոսյանի նվաճած ոսկե մեդալների մասին, ասաց. «Շնորհավորում եմ բոլորիս: Անգամ պատանեկան օլիմպիական խաղերում երկու ոսկե մեդալը լուրջ ցուցանիշ է, ընդհանուր թիմային աշխատանքի արդյունք: Շնորհակալություն եմ հայտնում մեր ֆեդերացիային, նախագահ Արմեն Շահազիզյանին, ՀԱՕԿ-ի նախագահ Գագիկ Ծառուկյանին, մեր ծանրորդների անձնական մարզիչներին, բոլոր նրանց, ովքեր աջակցել են մեզ: Առանց թիմային նպատակադրված աշխատանքի այս հաջողությունը չէր լինի, իսկ ես` որպես պատանեկան հավաքականի ավագ մարզիչ, ոչինչ անել չէի կարողանա:
Ամեն մի մարզիչ կերազի այսպիսի թիմ, այսքան դաստիարակված սաներ ունենալ: Կարեւոր չի, որ ծանրորդը տեխնիկապես լավ է պատրաստված, ֆիզիկապես ուժեղ է:
Կարեւորը` նրանք լավ մարդ են, գիտեին, թե ինչ համար են մեկնել Նանկին: Նրանք հասկանում ու հավատում էին իրենց: Դրա շնորհիվ արդյունքներն ունեցանք: Եթե մարզիկն ընտանիքից, անձնական մարզչից ճիշտ դաստիարակված է գալիս հավաքական, արդյունք անպայման պետք է լինի: Եթե արդյունք չլինի, ուրեմն մեղավորությունն իմն է, ոչ նրանց անձնական մարզիչներինը կամ մեկ ուրիշինը: Հենց այս բոլորը միասին բերեցին ոսկե մեդալները: Հակոբն ու Սիմոնը հավաքականում պատահական մարդիկ չէին ու բոլոր առումներով էլ լավ նախապատրաստված էին: Չնայած 17 տարեկան են, բայց հավաքների, մարզումների ընթացքում ամեն ինչի դիմացան ու ամեն բան հասկանում էին: Ցանկանում եմ, որ նրանք նույն արդյունքով վերադառնան նաեւ Ռիո-2016-ի օլիմպիական խաղերից»:
Աշոտ ՀԱԿՈԲՅԱՆ
