ԵԱՀԿ Մինսկի խմբի ամերիկացի համանախագահ Ջեյմս Ուորլիքը «Թուրան»-ին տված հարցազրույցում հայտնել է, որ Հայաստանի նախագահ Սերժ Սարգսյանը և Ադրբեջանի նախագահ Իլհամ Ալիևը հնարավոր է հանդիպեն սեպտեմբերի սկզբին Ուելսում կայանալիք ՆԱՏՕ-ի գագաթնաժողովի ժամանակ, փոխանցում է «Ռեգնում» լրատվական գործակալությունը:
«Դա կախված է նախագահների պատրաստակամությունից և ցանկությունից», – ասել է դիվանագետը՝ նշելով, որ ԱՄՆ պետքարտուղար Ջոն Քերին պատրաստ է անձամբ ներգրավվել հակամարտության կարգավորման գործընթացում, – «Մենք կողմերին կոչ ենք անում հաշվի առնել այս հնարավորությունները: Հարցը միայն արտաքին գործերի նախարարների կամ նախագահների մակարդակով հանդիպումներ կազմակերպելը չէ: Հարկավոր է գործընթացն այլ մակարդակի բարձրացնել, որպեսզի այն խաղաղ կարգավորման բերի: Այնպես որ, եկեք սկսենք»:
Խոսելով օգոստոսի 10-ին Սոչիում կայացած Ռուսաստան-Հայաստան-Ադրբեջան եռակողմ հանդիպման մասին՝ Ուորլիքն ասել է. «Ես տեղյակ չեմ այդ բանակցությունների բոլոր մանրամասներին, սակայն հասկանում եմ, որ քննարկումները լուրջ են եղել»:
Նա նաև նշել է, որ կողմերը հաստատել են Ֆրանսիայի նախագահ Ֆրանսուա Օլանդի միջնորդությամբ հոկտեմբերի վերջին Փարիզում հանդիպելու պատրաստակամությունը և խոսել ՄԱԿ-ի գլխավոր վեհաժողովում հնարավոր հանդիպման մասին:
Կարդացեք նաև
Պատրաստեց Հովհաննես ԻՇԽԱՆՅԱՆԸ
