Կոտայքի մարզի ընդհանուր իրավասության դատարանում, ուր շարունակվում է Վարդան Պետրոսյանի ավտովթարի գործով դատական հերթական նիստը, միջնորդությամբ հանդես եկավ նրա պաշտպանը՝ ՀՀ փաստաբանների պալատի անդամ Նիկոլայ Բաղդասարյանը:
Նա միջնորդեց ոստիկանության Կոտայքի մարզի քննչական բաժնի ավագ քննիչ Հայկարամ Հակոբյանի որոշումները՝ դեպքի վայրի զննության եւ լրացուցիչ զննության մասին, ինչպես նաեւ դատատեխնիկական փորձաքննության արձանագրությունը ճանաչել անթույլատրելի:
Նա դատարանին ներկայացրեց լուսանկարներ, որով դարձյալ պետք է հիմնավորվեր, որ դեպքի վայրն իրականում բանուկ մասն է, ոչ կողնակը՝ ինչպես նշվում է:
Նիկոլայ Բաղդասարյանը բերեց ՀՀ վճռաբեկ դատարանի նախադեպային որոշումներից մեկը, որով դատարանին կոչ արեց օրենքի միատեսակ կիրառում, քանի որ ըստ նրա՝ ապացույցները անթույլատրելի չճանաչվելու դեպքում խախտված կմնան իր պաշտպանյալի իրավունքները:
Կարդացեք նաև
Դատարան էր ներկայացել եւ ցուցմունք տվեց Վարդան Պետրոսյանի հարեւանը՝ Օնիկ Հակոբյանը, որը հայտնեց, թե այդ օրը նկարահանում է եղել, սեղանին դրված են եղել օղու բաժակներ՝ մեջը ջուր: Տուժողների ներկայացուցիչ Ռուբեն Բալոյանի հարցին՝ ո՞վ է ջուրը լցրել, վկան ասաց, որ հնարավոր է՝ ինքն է լցրել: Հաջորդ հարցին՝ խմե՞լ եք բաժակից, վկան պատասխանեց՝ այո, եւ հաջորդ հարցին՝ տնակա՞ն օղի է եղել սեղանին, քանի որ կա նման ցուցմունք, վկան պատասխանեց, որ ցուցմունք տվողը ստել է:
Մանրամասները՝ քիչ հետո:
Ռուզան ՄԻՆԱՍՅԱՆ
