«Մեր նպատակը մեկն է՝ կանխել, նվազեցնել եւ բացառել սեռով պայմանավորված հղիությունների արհեստական ընդհատումները Հայաստանում»,-այսօր «Մեդիա կենտրոնում» սեռով պայմանավորված հղիությունների արհեստական ընդհատումների վերաբերյալ քննարկման ընթացքում ասաց ՀՀ առողջապահության նախարարության մոր եւ մանկան առողջության պահպանման վարչության պետ Կարինե Սարիբեկյանը:
Բանախոսը ներկայացրեց, որ ընդհանրապես հղիության արհեստական ընդհատումները օրենսդրորեն թույլատրված գործընթացներ են. «Թույլատրվում է մինչեւ 12 շաբաթական ժամկետը ընդհատել կնոջ ցանկությամբ, իսկ 12 շաբաթականից հետո միայն այն դեպքում, եթե կան բժշկական ցուցումներ կամ սոցիալական ցնցումներ»:
Տիկին Սարիբեկյանի փոխանցմամբ Հայաստանում սովորաբար տղաները ավելի շատ են ծնվում, քան տղաները. «Հայաստանում առաջին երեխայի դեպքում չունենք սելեկտիվ աբորտի խնդիր, երկրորդ երեխայի պարագայում կարծես թե գործընթացը սկսվում է, բայց երրորդ երեխայի դեպքում ՝ տղաների եւ աղջիկների հարաբերակցությունը շատ է երեւում՝ 100 աղջկա դիմաց ծնվում է մոտ 160 տղա»:
Տիկին Սարիբեկյանի ներկայացմամբ՝ միջինում տարեկան 1500-ից 2000 աղջիկ երեխա չի ծնվում, միայն նրա համար, որ նա բեղմնավորվել է որպես աղջիկ:
Կարդացեք նաև
Տիկին Սարիբեկյանը հավելեց նաեւ, որ պետք է օրենսդրորեն արգելել սեռով պայմանավորված հղիությունների արհեստական ընդհատումները, ինչի առկայության դեպքում արդեն ոչ թե տուգանքներ կկիրառվեն, այլ միանգամից քրեական վարույթ կհարուցվի, որը կզգաստացնի ծնողներին:
Ասուլիսի ընթացքում ՄԱԿ-ի բնակչության հիմնադրամի գործադիր ներկայացուցիչ Գարիկ Հայրապետյանը նշեց, որ Հայաստանում խնդիրը ի հայտ է եկել մոտ 20 տարի առաջ, իսկ աշխարհում այն 30-35 տարի կա: Նրա ներկայացմամբ՝ սեռով պայմանավորված հղիությունների արհեստական ընդհատումների դեմ դեռեւս ոչ մի լուծում աշխարհում չկա. «Միակ լուծումը մտածելակերպի փոփոխությունն է, սակայն սա էլ մեկ շաբաթում կամ մեկ տարում լուծելու խնդիր չէ»:
Պրն Հայրապետյանի խոսքով՝ լուրջ մարտահրավերներ կան. «1993 թվականից սկսած մինչեւ այսօր Հայաստանում մինչեւ 21 տարեկան մոտ 50 հազար տղա ավելի է ծնվել, քան աղջիկ, իսկ դա նշանակում է, որ 50 հազար տղա պետք է գտնի իր զույգին, որն իր արտացոլումն է ունենալու հասարակության վրա»:
Նրա կանխատեսումների համաձայն՝ մինչեւ 2060 թվականը Հայաստանում չի ծնվի մոտ 100 հազար ապագա մայր, որը կազմում է Հայաստանի բնակչության 3 տոկոսը:
Էլյա ՀՈՎՀԱՆՆԻՍՅԱՆ
