Արտաքին գործերի նախարար Էդվարդ Նալբանդյանի` Թուրքիայի նախագահ Ռեջեփ Թայիփ Էրդողանի երդմնակալության մասնակցությունը ՀՀ նախագահի ընտրությունով է պայմանավորված: Այս մասին այսօր ասաց ԱԳՆ փոխնախարար Շավարշ Քոչարյանը կառավարությունում` պատասխանելով լրագրողների հարցին, թե ինչով է պայմանավորված հայկական կողմի մասնակցությունը Թուրքիայի նախագահի երդմնակալության արարողությանը:
Aravot.am-ը հետաքրքրվեց, ի՞նչ լուրջ բան կտա Հայաստանին այդ մասնակցությունը, թե` սա պարզապես արարողակարգային քայլ է: Շավարշ Քոչարյանն ասաց. «Հարեւան երկրի նախագահը, երբ որ ունենում է երդմնակալություն, ինչպես նաեւ այլ առիթներով… դրանում որեւէ խնդիր չկա: Դա ավանդական է, եւ միշտ տեղի է ունենում փոխանակում»:
Ըստ ԱԳՆ փոխնախարարի` մինչ այս, Թուրքիայի նախագահն ընտրվել է պառլամենտի կողմից, եւ այս տարի առաջին անգամն է, որ ընտրությունը կատարվել է ուղղակի. «Դրա համար սա առաջին նախադեպն է, որ մեր հարեւան երկրում կա այդ արարողությունը»:
Լրագրողներից մեկի հարցին`ի՞նչ նորություններ կան հայ-թուրքական սահմանի բացումից, Շավարշ Քոչարյանն ասաց` «Չկան լուրեր»:
Կարդացեք նաև
Նելլի ԲԱԲԱՅԱՆ
