Կրթության փորձագետ Անահիտ Բախշյանը Aravot.am-ի հետ զրույցում խոսելով ԿԳ նախարար Արմեն Աշոտյանի ամփոփիչ ասուլիսի մասին, անդրադարձավ նախարարի այն հայտարարությանը, թե պետք է դպրոցներում մեծ ուշադրություն դարձվի ռազմահայրենասիրական դաստիարակության վրա, որովհետեւ օրենքը պահանջում է հայրենասեր քաղաքացի դաստիարակել: «Պետք չէ հայրենասեր քաղաքացի դաստիարակել, պետք է ուղղակի հայրենասեր պետություն լինի, հայրենասեր իշխանություն, ուսուցչի, հատկապես՝ սահմանամերձ գյուղերի ուսուցիչների մասին հոգացող հայրենասեր կառավարություն լինի, որպեսզի երեխաներն էլ, Մովսես գյուղի, Ջանֆիդայի, կամ Երեւանի, տեսնեն ու զգան դա, եւ իրենք էլ լինեն հայրենասեր:
Ինչ վերաբերում է Երկրապահ կամավորականների միությանը, որի հետ պետք է ԿԳ նախարարությունը հայրենասիրական ծրագիր անի, այո՛, Երկրապահը կռվել է ժամանակին, բայց շատ լավ գիտենք, թե հիմա ինչ խոսակցություններ են պտտվում նրա շուրջ: Այնպես որ, մարդու գործը պետք է լինի հայրենասիրական ընդգծված նպատակներով, ասածդ դա է»,-կարծում է կրթության փորձագետը:
Գոհար ՀԱԿՈԲՅԱՆ
Լուսանկարը` Գագիկ Շամշյանի
