Աշխատանքի եւ սոցիալական հարցերի նախարար Արտեմ Սարգսյանը չի մտահոգվել կենսաթոշակային օրենքի սահմանադրական լինելը վիճարկելու քաղաքական ուժերի մտադրությունից:
Հարցին, թե կառավարությունը մտավախությո՞ւն չունի, որ օրենքի որոշ դրույթներ կրկին կճանաչվեն հակասահմանադրական, նախարարն ասաց` ոչ. «Այն բոլոր դիրքորոշումները, որոնք արտահայտվել են սահմանադրական դատարանի կողմից, հաշվի են առնվել, Ազգային ժողովի կողմից քննարկվել են եւ ընդունվել»:
Նրա խոսքով, նախորդ օրենքը հակասահմանադրական էր այն դրույթներով, որոնք Սահմանադրական դատարանը հակասահմանադրական ճանաչեց:
Հարցադրմանը, թե այդ դեպքում ինչպե՞ս կարող էր ՀՀ նախագահը կողմ լինել հակասահմանադրական օրենքին, նախարարը դիտողությունը արեց` հարցը կոռեկտ չէ. «Ցանկացած օրենք քանի դեռ սահմանադրական դատարանում չի քննարկվել եւ դրա վերաբերյալ այլ որոշում չի կայացվել՝ սահմանադրական է»:
Արփինե ՍԻՄՈՆՅԱՆ
