«Մինասյանն ընդդեմ Հայաստանի» գործով Մարդու իրավունքների եվրոպական դատարանի կայացրած վճռի կատարման համար կառավարությունը արդարադատության նախարարությանը կտրամադրի 6030 եվրոյին համարժեք դրամ:
Այս մասին տեղեկանում ենք կառավարության նիստի օրակարգից:
Մարդու իրավունքների եվրոպական դատարանը (ՄԻԵԴ) վճռել է, որ խախտվել է «Մարդու իրավունքների եւ հիմնարար ազատությունների պաշտպանության մասին» Կոնվենցիայի 5-րդ հոդվածի 1-ին եւ 4-րդ կետերը` ՀՀ քաղաքացի Վարդանի Մինասյանի ազատության եւ անձնական անձեռնմխելիության իրավունքը: Վարդան Մինասյանը միառժամանակ անօրինական կալանքի տակ է եղել:
Հիշեցնենք, որ այս տարվա մայիսի 14-ի ՀՀ գլխավոր դատախազությունն այս գործով պաշտոնական պարզաբանում է տվել` «Եվրոպական դատարանը քննության է առել, թե արդյոք Կոնվենցիայի 5-րդ հոդվածի 1-ին մասի խախտում չէ մինչդատական վարույթի ընթացքում կալանքի տակ պահելու՝ դատարանի որոշմամբ սահմանված ժամկետը լրացել է 2008 թվականի հոկտեմբերի 7-ին, իսկ Հյուսիսային քրեական դատարանը գործը վարույթ ընդունելու եւ կալանքի որոշումը կայացրել է 2008թ. հոկտեմբերի 15-ին: ՀՀ քրեական դատավարության օրենսգրքի 138-րդ հոդվածի 3-րդ մասն այս առնչությամբ ամրագրում է, որ նախաքննության ավարտից եւ գործը դատարան ուղարկելուց հետո անձին կալանքի տակ պահելու ժամկետի ընթացքը կասեցվում է եւ անձն առանց դատարանի որոշման կարող է պահվել կալանքի տակ: Այսպիսի կարգավորումն, իհարկե, հակասում է եվրոպական չափանիշներին եւ մինչև 2009 թվականի ապրիլի 10-ը, այսինքն՝ մինչեւ Վարդան Մինասյանի գործով ՀՀ վճռաբեկ դատարանի որոշումը հիշյալ իրավանորմի հիման վրա ձևավորված պրակտիկան նույնպես չէր բխում Եվրոպական դատարանի իրավական չափանիշներից»:
Կարդացեք նաև
Հիշեցնենք, որ 2007 թվականին Վարդան Մինասյանի մասնակցությամբ հրազենի օգտագործմամբ վեճ է տեղի ունեցել 2 խմբերի միջեւ, Մինասյանի նկատմամբ քրեական գործ էր հարուցվել, վերջինս կալանավորվել էր, երբ ինքնակամ ներկայացել էր ոստիկանություն եւ հանձնել իր զենքը:
Սա առաջին դեպքը չէ, երբ իրավապահ մարմինների սխալի պատճառով ՀՀ արդարադատությունը պարտվում է ՄԻԵԴ-ում, եւ արդյունքում վնասի փոխհատուցումը վճարվում է պետբյուջեից` շարքային հարկատուների հաշվին:
Նելլի ԲԱԲԱՅԱՆ
