ՀՀ առողջապահության նախարար Արմեն Մուրադյանի մոտ այսօր կայացավ գործակարգավարական հերթական խորհրդակցություն մարզպետարանների առողջապահության ոլորտի պատասխանատուների մասնակցությամբ:
Նախ ներկայացվեց նախորդ խոհրդակցության ժամանակ տրված` մարզերի առողջապահական համակարգի զարգացմանը միտված հանձնարարականների կատարման ընթացքը։ Խոսքը վերաբերում էր թե՛ մարզային բժշկական հաստատությունների (առողջության պահպանման առաջնային օղակի և հիվանդանոցների) քարտեզագրմանն ու այդ ճանապարհով առկա խնդիրների գույքագրմանը, թե՛ մարզերի բուժհաստատություններում պահանջվող մասնագետներով ապահովմանը։ Նպատակահարմար գտնվեց մարզերից ստացված տեղեկատվությունները լրամշակման և նույնականացման համար ևս մեկ շաբաթ տրամադրել։
Հանձնարարվեց վերլուծելով մարզային բուժհիմնարկների թիվը, յուրաքանչյուրի շենքային պայմանները, կադրային հագեցվածությունն ու անհրաժեշտ թվով նեղ մասնագետներով ապահովվածությունը` ստեղծել յուրաքանչյուր մարզի զարգացման հեռանկարները` ելնելով բնակչության թվաքանակից և հիվանդացության ցուցանիշներից։ «Կճշգրտենք, թե որ մարզում ի՞նչ խնդիրներ ունենք լուծելու` սկսած դեղատնային կրպակներից մինչև խոշոր բուժհիմնարկները, բժշկական ծառայությունների ապահովումն ու որակը։ Ամփոփ այդ անձնագիրը մարզերի ղեկավարների հետ կքննարկվի մարզային այցերի ընթացքում, համատեղ պատասխանատվություն կկրենք ու կհետևենք դրանց իրականացման ընթացքին»,-ասաց Արմեն Մուրադյանը` հանձնարարելով, որ այդ աշխատանքներին մասնակից դառնան նաև ՀՀ ԱՆ Առողջապահության ազգային ինստիտուտը և Ծրագրերի իրականացման գրասենյակը։
Նշվեց, որ Երևանի բուժհաստատությունների գույքագրումը շատ ավելի ծավալուն կլինի և առանձին քննարկումներ կկազմակերպվեն։
Այնուհետև քննարկվեց մարզերում իմունականխարգելման ազգային ծրագրի իրականացման ընթացքը։ Նախարարը պահանջեց մեծ պատասխանատվությամբ կատարել բնակչությանն առողջ պահելու կարևոր այդ գործառույթը` նպատակ հետապնդելով հնարավորինս բարձրացնել ընդգրկվածությունը։
Քննարկվեցին նաև առողջության առաջնային պահպանման օղակի կառավարմանն առնչվող և այլ հարցեր։
ՀՀ առողջապահության նախարարություն
