«Եթե հարաբերություններ չկան՝ ասել, որ դրանք կարող են ավելի բացասական լինել, նշանակում է, որ զրոյական հարաբերություններից դուք պիտի անցնեք ավելի բացասական հարաբերությունների»,-Aravot.am-ի հարցին` համամի՞տ է, որ Թուրքիայի նախկին նախագահ Աբդուլլահ Գյուլն ավելի հանդուրժող գործիչ էր ի տարբերություն նորանշանակ նախագահ Ռեջեփ Թայիփ Էրդողանի, հետևաբար բացասական զարգացումներ են ակնկալվում հայ-թուրքական հարաբերություններում, այպիսի կարծիք հայտնեց ԱՊՀ երկրների ինստիտուտի հայկական մասնաճյուղի տնօրեն, քաղաքագետ Ալեքսանդր Մարկարովը:
Նա աբսուրդ ու ծայրահեղացված համարեց ցույց տալ, թե զրոյական հարաբերություններում ավելի բացասական հարաբերություններ են ակնկալվում ու մանրամասնեց. «Եթե խոսում ենք Էրդողան-Դավութօղլու տանդեմի մասին, որը ձևավորվում է Թուրքիայում այսօր, ապա այս երկու գործիչները եղել են այն քաղաքականության ճարտարապետը, որը Թուրքիան վարում է վերջին 5-7 տարվա ընթացքում, որը հայ-թուրքական հարաբերությունների ընթացքում ցույց տալով, թե հայկական կողմը, պատրաստ լինելով սկսել կառուցել հարաբերություններ, բացարձակապես չընդունվեց: Եվ համապատասխան գործընթացները, որոնք սկսվեցին Շվեյցարիայում, բերել են նրան, որ թուրքական կողմն այսօր ցույց է տալիս աշխարհին, թե այն քաղաքականությունը, որ նրանք հռչակել են`զրո խնդիր հարևաների հետ, հանգել է զրո հարևան` առանց խնդրի քաղաքականության»:
Ըստ Ալեքսանդր Մարկարովի` փոփոխությունների համար նախադրյալներ են պետք, քաղաքական ուղերձներ, բայց թուրքական կողմից հնչած միակ ուղերձը ապրիլյան ուղերձն էր, որտեղ չի երևում դիրքորոշման փոփոխություն: Այն, որ ՀՀ ԱԳ նախարար Էդվարդ Նալբանդյանը մասնակցելու է Թուրքիայի նախագահի երդմնակալության արարողությանը, պարոն Մարկարովը համարում է, որ դա հնարավորություն կտա հասկանալ արդյոք կա՞ն փոփոխությունների միտումներ, կառուցողական հարաբերությունների հեռանկար:
Կարծիքներ կան, որ Էրդողանի բնավորությունն ու անկանխատեսելիությունը հաշվի առնելով` հնարավոր է Հայոց ցեղասպանության 100-ամյա տարելիցին նա գա ու բարձրանա Ծիծեռնակաբերդ: Այս առիթով Ալեքսանդր Մարկարովն ասաց. «Ես առայժմ վստահ չեմ, որ Էրդողանը գալու է Հայաստան»:
Տաթև ՀԱՐՈՒԹՅՈՒՆՅԱՆ
